Ýurdumyzyň Daşoguz welaýatynyň kärendeçileri güýzlük ýeralmanyň bol hasylyny ýygnadylar. Şeýlelik bilen 2020-nji ýylda bolşy ýaly, bu ýyl hem güýzlük ýeralmany taýýarlamak boýunça tabşyryklary ýerine ýetirdiler.
Welaýatda sowuk düşmänkä, ekin meýdanlaryndan 11,244 tonna hasyl ýygnaldy. bu bolsa göz öňünde tutulan meýilnamadanam artykmaç tabşyrylandygyna şaýatlyk edýär. Hasyl ýygnamaga welaýatyň degişli ähli bölümleri sazlaşykly hereket edip, iş gysga wagtda we guramaçylykly ýagdaýda amala aşyryldy.
Demirgazyk sebitde şu ýyl Gurbansoltan eje we S. A. Nyýazow adyndaky etraplarda, şeýle hem Gubadag etrabynda 800 gektar meýdanda ekildi. Çylşyrymly howa şertlerine garamazdan bu ýerde ekine degişli ideg edilip, her gektardan pesinden bir ýüz kyrk sentner hasyl ýygnaldy.
Daşoguz welaýatynda tejribeli daýhanlaryň toplan tejribesi ýylda iki hasyl almaga mümkinçilik berýär. Bu bolsa ýurdumyzda daýhanlara yzygiderli goldaw berilmeginiň we olaryň höweslendirilmeginiň netijesinde mümkin boldy.
Ýagşygül SARYÝEWA,
S.A.Nyýazow adyndaky
Türkmen oba hojalyk uniwersitetiniň
mugallymy.
Teswirler