Adatça baýlyk barada söz açylanda, adamlar ilki bilen maddy zatlary göz öňüne getirýärler. Emma hakyky we zaman geçse-de gadyry gaçmaýan, ogurlap ýa-da ýitirip bolmaýan yzygiderli baýlyk — bu ylym we bilimdir. Bilim adamyň ruhy dünýäsini baýlaşdyrýan, onuň dünýägaraýşyny giňeldýän we durmuşda dogry ýoly tapmagyna kömek edýän iň beýik gymmatlykdyr. Şonuň üçin hem adamlaryň alýan bilimi olaryň ömürlik hemrasyna we iň ynamly diregine öwrülýär.
Häzirki çalt ösýän dünýäde bilim diňe bir adamyň şahsy ösüşi üçin däl, eýsem bütin jemgyýetiň hem-de döwletimiziň gülläp ösmegi üçin hem esasy şertleriň biridir. Bilimli we giň gözýetimli adamlar täze pikirleri, innowasiýalary hem-de önjeýli çözgütleri öňe sürýärler. Munuň özi ýurdumyzyň ykdysadyýetiniň, medeniýetiniň we durmuş ulgamynyň ähli ugurlarda yzygiderli ösmegini üpjün edýär. Şol sebäpli hem bilimli hünärmenleri ýetişdirmek geljege goýulýan iň uly we bahasyz maýa goýumdyr.
Bilim adama diňe bir hünär öwretmän, eýsem ony jemgyýetde öz ornuny tapmaga, ahlak taýdan arassa we jogapkärli şahsyýet bolup ýetişmäge hem ugrukdyrýar. Zähmetkeşlik, watansöýüjilik, ulyny sylamak we kynçylyklary üstünlikli ýeňip geçmek ýaly asylly häsiýetler bilim almak we ylmyň çuňňur syrlaryny özleşdirmek arkaly kemala gelýär. Bilim adama öz mümkinçiliklerine bolan ynamy berýär hem-de täze belentliklere ýetmäge ruhlandyrýar.
Bilim — bu bütin ömrümiziň dowamynda bizi ýagty geljege iterýän we hiç wagt könelmeýän hem-de bahasy ölçenip bilinmeýän tükeniksiz baýlykdyr. Bu baýlyga eýe bolan adam hem-de jemgyýet her bir bäsleşikde we synagda üstün çykýar. Geljekki nesillerimiziň bilimli, ylymly we giň dünýägaraýyşly bolup ýetişmegi üçin zähmet çekmek bolsa her birimiziň mukaddes borjumyzdyr.
Altyn ANNAMUHAMMEDOWA,
Aşgabat şäheriniň 78-nji ýöriteleşdirilen
orta mekdebiniň mugallymy.
Teswirler