Türkmen halkynyň baý medeni mirasy, milli aýdym-saz sungaty we asyrlaryň dowamynda kemala gelen däp-dessurlary jemgyýetçilik durmuşynyň aýrylmaz bölegidir. Her bir şatlykly wakanyň aýdym-saz, milli öwüşgin we agzybirlik bilen utgaşmagy halkymyzyň däp bolan ýol-ýörelgeleriniň dowam etdirilýändigini görkezýär.
4-nji noýabrda Daşoguz welaýatynda geçirilen dabaraly çäreler hem özboluşly medeni öwüşgine beslendi. Welaýatyň medeniýet we sungat ussatlary aýdym-sazly çykyşlary bilen dabaralara gatnaşyp, ýygnananlara baýramçylyk ruhuny paýladylar.
Daşoguz topragynyň özboluşly aýdym-saz däpleri, halk döredijiliginiň dürli görnüşleri we milli sungaty bu çykyşlaryň mazmunyny baýlaşdyrdy. Sazlaryň şirin owazy, ýerine ýetirijileriň ussatlygy hem-de dabaralaryň şowhuny çäräniň ruhubelentligini has-da artdyrdy.
Dabaraly çäreleriň dowamynda milli däp-dessurlara hem aýratyn orun berildi. Daşoguz şäherindäki «Türkmeniň ak öýi» binasynda geçirilen köpçülikleýin dabaraly çäreler mynasybetli toý sadakasy berildi. Bu asylly däp türkmen halkynyň sahawatlylyk, agzybirlik, birek-birege hormat goýmak ýaly milli häsiýetlerini özünde jemleýär.
Türkmeniň ak öýi halkymyzyň taryhy-medeni mirasyny, milli binagärlik sungatyny we däp-dessurlaryny dabaralandyrýan aýratyn ähmiýetli desgalaryň biridir. Şeýle giňişliklerde geçirilýän medeni çäreler milli gymmatlyklary ýaş nesle ýetirmekde, sungatyň dürli ugurlaryna bolan gyzyklanmany artdyrmakda möhüm ähmiýete eýedir.
Daşoguz welaýatynda ýaýbaňlandyrylan aýdym-sazly çykyşlar we milli däplere esaslanýan çäreler sebitiň medeni durmuşynyň baý mazmunyny ýene bir gezek görkezdi. Şeýle wakalar halkymyzyň ruhy gymmatlyklarynyň, sungata bolan söýgüsiniň we asylly däpleriniň nesilden-nesle geçirilmegine goşant goşýar.
Maglumatlary toplan: Firuza Dosçanowa,
Türkmen oba hojalyk institutynyň V ýyl talyby.
Teswirler