Türkmenistanyň hemişelik Bitaraplyk derejesi dünýä döwletleri bilen dostlukly we özara bähbitli gatnaşyklary ösdürmäge giň mümkinçilik berýär. Ýurdumyzda geçirilýän halkara forumlar, maslahatlar, sammitler we medeni çäreler dürli döwletleriň wekillerini bir ýere jemläp, hyzmatdaşlygy pugtalandyrmaga hyzmat edýär.
Halkara çäreleriň dowamynda syýasy, ykdysady, ulag, energetika, ekologiýa, medeniýet we bilim ugurlary boýunça pikir alşylyp, täze hyzmatdaşlyk mümkinçilikleri kesgitlenýär. Şeýle duşuşyklar döwletleriň arasynda özara ynamy artdyrýar we umumy meseleleriň gepleşikler arkaly çözülmegine şert döredýär.
«Awaza» milli syýahatçylyk zolagynda geçirilýän halkara çäreler bu ugurda aýratyn ähmiýete eýedir. 2025-nji ýylda Awazada Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahaty geçirildi. Bu forum Türkmenistanyň dünýä döwletleri bilen köpugurly hyzmatdaşlygy ösdürmäge goşýan goşandynyň aýdyň mysaly boldy.
Şeýle hem halkara medeni festiwallar halklaryň arasynda dostlukly gatnaşyklary berkitmäge ýardam edýär. Dürli ýurtlaryň sungat wekilleriniň bilelikdäki çykyşlary medeniýetleriň özara baýlaşmagyna, halklaryň biri-birine bolan hormatynyň artmagyna mümkinçilik berýär.
Netijede, halkara çäreler Türkmenistanyň daşary syýasatynyň möhüm guraly bolup, ýurdumyzyň dünýä döwletleri bilen dostlukly gatnaşyklaryny pugtalandyrýar. Şeýle çäreler parahatçylygy, özara düşünişmegi we hyzmatdaşlygy ösdürmek bilen bir hatarda, Türkmenistanyň halkara abraýynyň ýokarlanmagyna hem ýardam berýär.
N. PYLLYKOW,
Türkmenistanyň Telekommunikasiýalar we informatika institutynyň
Maglumat ulgamlarynyň howpsuzlygy fakultetiniň mugallymy.
Teswirler