Adam saglygy jemgyýetiň we döwletiň iň gymmatly baýlygydyr. Şonuň üçin ýurdumyzda ilatyň saglygyny goramak, keselleriň öňüni almak we raýatlar üçin ýokary hilli lukmançylyk hyzmatlaryny döretmek döwlet syýasatynyň esasy ugurlarynyň biri bolup durýar.
Soňky ýyllarda saglygy goraýyş ulgamynda döwrebap hassahanalar, sagaldyş merkezleri we anyklaýyş edaralary gurlup, lukmançylyk hyzmatlarynyň hili ýokarlandyrylýar. Täze tehnologiýalaryň we häzirki zaman enjamlarynyň ornaşdyrylmagy keselleri ir ýüze çykarmaga, netijeli bejergi geçirmäge hem-de adamlaryň ömrüniň dowamlylygyny artdyrmaga mümkinçilik berýär.
Milli özgertmeleriň möhüm ugry keselleriň öňüni almak we sagdyn durmuş ýörelgesini kemala getirmek bilen baglanyşyklydyr. Bedenterbiýe bilen meşgullanmak, dogry iýmitlenmek, şahsy arassaçylygy berjaý etmek we zyýanly endiklerden daşda durmak her bir adamyň saglygyny berkitmäge ýardam edýär.
Bagtyýar geljek diňe bir ösen lukmançylyk bilen däl, eýsem, sagdyn we ruhubelent nesli terbiýelemek bilen hem berk baglanyşyklydyr. Çagalaryň we ýaşlaryň saglygyna aýratyn üns berilmegi olaryň bilim almagy, hünär öwrenmegi we jemgyýetiň ösüşine işjeň gatnaşmagy üçin zerur şertleri döredýär.
Netijede, adam saglygyny goramaga gönükdirilen milli özgertmeler jemgyýetiň abadançylygyny we ýurdumyzyň geljegini üpjün edýän möhüm binýatdyr. Sagdyn nesil — kuwwatly döwlet, bagtyýar durmuş we ýagty geljek demekdir.
S. GURBANMYRADOW,
Türkmenistanyň Telekommunikasiýalar we informatika institutynyň
Maglumat ulgamlarynyň howpsuzlygy fakultetiniň mugallymy.
Teswirler