«Gazprom» Türkmenistanyň, Russiýanyň we Kataryň gatnaşmagynda gaz merkezini döretmek hakynda Eýranyň pikirini öwrener. Bu barada Russiýanyň wise-premýeri Aleksandr Nowak: “Eýranyň Türkmenistanyň, Russiýanyň we Kataryň gatnaşmagynda gaz merkezini döretmek baradaky teklibine baha bermek we öwrenmek gerek. Meniň pikirimçe, “Gazprom” kompaniýamyz bu meseläni öwrener. Eger bu, hakykatdanam, hakyky we potensial gowy taslama bolsa, elbetde, oňa Russiýa hem gatnaşar. Ýöne oňa baha bermeli we öwrenmeli” diýip, belläp geçdi.
Şeýle-de, Russiýanyň wise-premýeri häzirki wagtda türk hyzmatdaşlarynyň “Gazprom” tarapyndan Türkiýede gaz merkezini döretmegiň taslamasy boýunça taýýarlanan ýol kartasyny gözden geçirýändiklerini aýtdy.
Geçen hepde “Gazpromyň” ýolbaşçysy Alekseý Miller Eýranyň nebit ministri, NIOC-yň Müdirler geňeşiniň başlygy Jawad Ouji we Türkiýäniň Energetika we tebigy baýlyklar ministri Alparslan Baýraktar bilen duşuşyklary geçirdi. Duşuşyklar 11 – 13-nji oktýabrda Moskwada geçirilen “Rus energetika hepdeligi – 2023” halkara forumynyň çäginde geçdi.
Azamat HUDAÝBERDIÝEW,
Ýagşygeldi Kakaýew adyndaky
Halkara nebit we gaz
uniwersitetiniň talyby.
Teswirler