4-nji dekabrda Owganystan Yslam Respublikasynyň Farýap welaýatynyň Andhoý etrabynyň Akina şäherçesinde Türkmenistanyň serişdeleriniň hasabyna bina edilen 500 orunlyk metjidiň açylmagy türkmen-owgan dostlugynyň ýylýazgysyna täze sahypany ýazdy. Hormatly Prezidentimiz Gurbanguly Berdimuhamedowyň tabşyrygy boýunça ýurdumyzyň degişli ministrlikleriniň we pudaklaýyn dolandyryş edaralarynyň wekillerinden ybarat topar metjidiň açylyş dabarasyna gatnaşdy. Bu barada TDH habar berýär.
Ýurdumyzyň Mazari-Şarif şäherindäki konsullygynyň baglaşan şertnamasy esasynda Owganystanyň “Ghazanfar Construction, Roada Work Rail Way Construcion Material P.CO” gurluşyk kompaniýasy gurdy.
Metjidiň açylmagy Türkmenistanyň we Owganystanyň halklarynyň arasynda dost-doganlyk gatnaşyklaryny ösdürmegiň taryhynda möhüm waka öwrüldi.
Onuň gurluşygynda täze tehnologiýalar, özboluşly binagärlik çözgütleri, içki bezeg aýratynlyklarynda mukaddes ýazgylar ulanyldy. Toplumda sadaka dessurlaryny geçirmek üçin niýetlenen desga, awtoduralga bar. Metjidiň ýanaşyk ýerleri göwnejaý abadanlaşdyryldy.
Ýurdumyzdan ynsanperwerlik kömegi hökmünde Owganystana derman we lukmançylyk serişdeleriniň, azyk önümleriniň, dokma hem-de hojalyk harytlary iberildi.
Farýap welaýatynyň, Owganystanyň Daşary işler ministrliginiň ýolbaşçylary, din wekilleri, jemgyýetçilik agzalary we köp sanly adamlar düzüminde hormatly ýaşulular we din wekilleri bolan Türkmenistanyň wekiliýetini uly şatlyk bilen garşyladylar.
Dabara gatnaşyjylar Owganystanyň hökümetiniň we ähli halkynyň adyndan doganlyk kömegini edýändigi hem-de Owganystanyň durmuş-ykdysady taýdan ösüşine yzygiderli goldaw berýändigi üçin döwlet Baştutanymyza we tutuş türkmen halkyna tüýs ýürekden çykýan hoşallyk sözlerini aýtdylar.
Prezident Gurbanguly Berdimuhamedowyň başlangyjy bilen Owganystanda mekdep, hassahana we Hyratda çaga dogrulýan hassahana gurlup ulanylmaga berlipdi. Mundan başga-da, Türkmenistan Owganystany arzan bahadan elektrik energiýasy bilen üpjün edýär.
Jumanepes Hojanepesow,
S.A.Nyýazow adyndaky TOHU-nyň Gidromeliorasiýa fakultetiniň kafedra müdiri, uly mugallym.
Teswirler