Ýurdumyzda ylym-bilim ulgamynyň dünýäniň öňdebaryjy tejribelerine laýyklykda sazlaşykly ösdürilmegi hormatly Prezidentimiziň öňde goýan maksatlarynyň üstünlikli amala aşyrylmagy üçin ajaýyp şertleri emele getirýär. Bilim ulgamynda durmuşa geçirilýän beýik işleriň ählisiniň düýp özeninde, ilkinji nobatda, ýurdumyzda geljekde hem kuwwatly ösüşleri üpjün etmek üçin berk binýady emele getirmek, halkymyzyň eşretli we şöhratly geljegi, ylymly-bilimli, lebzihalal, giň dünýägaraýyşly, sagdyn ruhly nesli terbiýeläp ýetişdirmek meselesi esasy orunda durýar.
Ýurdumyzda täze taslamalar durmuşa geçirilýär. Bimöçber giň gerimli syýasatyň ygtybarly, berk binýady gurlan desgalaryň we binalaryň uzak ömürli hyzmat etmegini, ilatyň ýüze çykyp biläýjek tebigy we tehnogen hadysalara garşy dessin goragyny üpjün etmek döwrüň möhüm wezipeleriniň biri bolup durýar. Şol bir wagtda ýurdumyzda bu ugurdan ýokary bilimli hünärmenleri taýýarlamak has wajypdyr.
Mälim bolşy ýaly, şu ýylyň 1-nji sentýabrynda hormatly Prezidentimiz Serdar Berdimuhamedowyň gatnaşmagynda Türkmen döwlet binagärlik-gurluşyk institutynyň täze binalar toplumynyň düýbi tutuldy. Bu ýatdan çykmajak waka biziň göwün guşumyzy ganatlandyryp, şatlygymyza şatlyk goşdy. Türkmen döwlet binagärlik-gurluşyk institutynyň 5 müň orunlyk binalar toplumy «Ajaýyp-gurluşyk» hususy kärhanasy tarapyndan bina ediler. Institutyň binalar toplumyny 2026-njy ýylyň sentýabr aýynda ulanmaga doly taýýar edip tabşyrmak göz öňünde tutulýar.
Ýeri gelende belläp geçsek, ýokary okuw mekdebimiz Türkmenistanyň döwlet we hususy eýeçilikdäki edaralary we kärhanalary üçin ýöriteleşdirilen ugurlar boýunça hünärmenleri taýýarlaýar we her ýylda ýokary bilimli hünärmenleriň ýüzlerçesini goýberýär.
Goý, berkarar Diýarymyzy ösüşleriň röwşen ýoly bilen öňe alyp barýan Gahryman Arkadagymyzyň, hormatly Prezidentimiz Arkadagly Serdarymyzyň janlary sag, ömürleri uzak bolsun, öňde goýýan belent maksatlary elmydama rowaçlyklara beslensin!
Mülkiaman YMAMKASYMOW,
Türkmen döwlet binagärlik-gurluşyk
institutynyň talyby.
Teswirler