2021-nji ýylyň 28-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň göçme kubogyny almak ugrunda ýurdumyzyň ýokary okuw mekdepleriniň talyplarynyň arasynda energetika, ulag, suw diplomatiýa ugurlary boýunça bäsleşik geçirildi.
Oňa Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Ý.Kakaýew adyndaky Halkara nebit we gaz uniwersitetiniň, S.A.Nyýazow adyndaky Türkmen oba hojalyk uniwersitetiniň, Türkmen oba hojalyk institutynyň, Türkmenistanyň Inžener-tehniki we ulag kommunikasiýalary institutynyň, Türkmenistanyň Döwlet energetika institutynyň şeýle hem Türkmenistanyň Daşary işler ministrliginiň Halkara gatnaşyklary institutynyň talyplary gatnaşdylar.
Bäsleşige adalatly baha bermek üçin Türkmenistanyň Daşary işler ministrliginiň wekilinden, “Bir dünýä” hususy kärhanasynyň direktoryndan, Türkmenistanyň Magtymguly adyndaky Ýaşlar guramasynyň Merkezi Geňeşiniň hünärmeninden düzülen bitarap eminler topary gatnaşdy.
Bu bäsleşik oňa gatnaşyjylaryň Türkmenistanyň Prezidentiniň daşary syýasatyny, ilkinji nobatda energetika, ulag we suw meseleleri boýunça netijeli halkara hyzmatdaşlygyny alyp barmaga gönükdirilen başlangyçlaryny hem-de olaryň iş ýüzünde durmuşa geçirilişini çuňňur öwrenmek esasynda bilimlerini artdyrmagyna we tejribede ulanmagyna gönükdirilidi. Gatnaşyjy toparlar özlerini tanyşdyrmak, dürli soraglara jogap bermek we her dürli ýagdaýlarda baş alyp çykmak, şeýle-de prezentasiýalary taýýarlamak şertleri boýunça bäsleşdiler.
Bäsleşigiň ahyrynda birinji orna Türkmenistanyň Daşary işler ministrliginiň Halkara gatnaşyklary institutynyň topary, ikinji orna Magtymguly adyndaky Türkmen döwlet uniwersitetiniň topary, üçünji orunlara bolsa Ý.Kakaýew adyndaky Halkara nebit we gaz uniwersitetiniň, Halkara ynsanperwer ylymlary we ösüş uniwersitetiniň toparlary eýe bolup, ýeňiji toparlar diýlip yglan edildi.
Şeýle-de bäsleşikde “Iň gowy iňlis dilinde çykyş eden topar”, “Iň gowy rus dilinde çykyş eden topar”, “Iň gowy kapitan”, nominasiýalar boýunça iň işjeň gatnaşan toparlara diplomlar, sertifikatlar we ýadygärlik sowgatlary gowşuryldy. Bäsleşigiň gatnaşyjylary bolan talyp ýaşlar öz bilimlerini artdyrmak üçin şeýle mümkinçilikleri döredip berýän hormatly Arkadagymyza köp sag bolsunlar aýtdylar.
Seýli ARYŞOW,
Türkmenistanyň Daşary işler ministrliginiň
Halkara gatnaşyklary institutynyň talyby
Teswirler