Jemgyýetiň ösüşinde bilim we terbiýe möhüm orun eýeleýär. Sebäbi her bir döwletiň geljegi bilimli, giň dünýägaraýyşly, ahlak taýdan kämil ýaş nesle baglydyr. Şu nukdaýnazardan, pedagogika ylymy ýaş nesli terbiýelemekde we şahsyýeti kemala getirmekde uly ähmiýete eýedir.
Pedagogika – adamy okatmagyň, terbiýelemegiň we ösdürmegiň usullaryny öwrenýän ylymdyr. Onuň esasy maksady diňe bir bilimli däl, eýsem özbaşdak pikirlenip bilýän, jogapkärçilikli, zähmetsöýer we jemgyýete peýdaly şahsyýeti kemala getirmekden ybaratdyr.
Bilim bilen terbiýe biri-biri bilen aýrylmaz baglanyşyklydyr. Bilim adama dünýäni tanamaga we dogry netije çykarmaga kömek edýän bolsa, terbiýe şol bilimleri ýagşy maksatlar üçin peýdalanmagy öwredýär. Şonuň üçin hem hakyky kämillik bilimlilik bilen oňat häsiýetleriň utgaşmagynda ýüze çykýar.
Bu ugurda mugallymyň orny aýratyn ähmiýetlidir. Mugallym diňe bir bilim berýän hünärmen bolman, eýsem ýaşlara görelde görkezýän, olaryň ukyplaryny açmaga ýardam edýän terbiýeçidir. Onuň hünär ussatlygy, sabyrlylygy we okuwçylar bilen dogry gatnaşyk saklamagy bilim-terbiýeçilik işiniň netijeliligini kesgitleýär.
Häzirki döwürde pedagogika ylymy hem täze ösüşlere eýe bolýar. Sanly tehnologiýalaryň we döwrebap okatmagyň usullarynyň ulanylmagy okuwçylaryň özbaşdak pikirlenmek, maglumatlary seljermek we döredijilikli çemeleşmek başarnyklaryny ösdürýär. Şeýle-de her bir okuwçynyň şahsy aýratynlyklaryny nazara almak bilim işiniň möhüm şertleriniň biridir.
Pedagogikanyň esasy wezipeleriniň biri ýaş nesli milli we umumadamzat gymmatlyklarynyň ruhunda terbiýelemekdir. Watançylyk, zähmetsöýerlik, dogruçyllyk, ulyny sylamak we ynsanperwerlik ýaly häsiýetler ýaşlaryň ruhy dünýäsini baýlaşdyrýar.
Netijede, pedagogika diňe bir bilim bermek bilen çäklenmän, eýsem jemgyýetiň geljegini gurýan şahsyýetleri kemala getirmäge hyzmat edýän möhüm ylymdyr. Çünki bilimli we terbiýeli nesil islendik jemgyýetiň iň gymmatly baýlygydyr.
Ogulbike Öräýewa,
Seýitnazar Seýdi adyndaky Türkmen döwlet mugallymçylyk institutynyň talyby.
Teswirler