Ýaponiýanyň Aýti prefekturasynyň Nagoýa şäherinde geçirilýän XX tomusky Aziýa oýunlarynda Türkmenistanyň ýygyndy topary ilkinji çykyşlaryny geçirdi. 19-njy sentýabrda badalga alan iri sport ýaryşynda türkmen türgenleri birnäçe ugur boýunça medallar ugrunda bäsleşýärler. Oýunlar 4-nji oktýabra çenli dowam eder.
Bu Aziýa oýunlarynda Türkmenistanyň ýygyndysy sportuň sekiz görnüşinde – boks, erkin we grek-rim göreşi, karate, kuraş, ýeňil atletika, suwda ýüzmek, agyr atletika hem-de uşu boýunça çykyş edýär. Milli toparyň düzüminde jemi 34 türgen bar. Türkmenistanyň 57 adamdan ybarat wekiliýetinde türgenlerden başga tälimçiler we beýleki hünärmenler hem çykyş edýär.
Ýaryşlaryň açylyş dabarasy Nagoýadaky «Paloma Mizuho» stadionynda geçirildi. Türkmenistanyň wekiliýeti türgenleriň paradyna 40-njy belgide gatnaşdy. Ýurdumyzda uşu boýunça çykyş edýän Muhammet Jumamyradow milli baýdagymyzy göterdi. Bu Türkmenistanyň Aziýa oýunlaryna garaşsyz topar hökmünde gatnaşýan dokuzynjy gezekki çykyşydyr.
Ýaryşyň ilkinji günlerinde türkmen türgenleriniň arasynda uşu-sanda boýunça çykyş edenler üns merkezinde boldy. 60 kilograma çenli agram derejesinde Merjen Joraýewa nepally Rita Takulladan 2:0 hasabynda üstün çykyp, çärýek finala çykdy. 65 kilograma çenli agram derejesinde Hezret Öwezgeldiýew hem indiki tapgyra geçmek ugrunda eýranly Şoja Panahigelehkolaei bilen duşuşar. Şol bir wagtda Bibimeryem Akmuhammedowa we Muhammet Jumamyradow öz çykyşlaryny 1/8 final tapgyrynda tamamladylar.
Karate boýunça Raýan Gurbanmyradow 60 kilograma çenli agram derejesinde ýaryşa üstünlikli başlap, 1/16 finalda Filippinlerden Jon Kristian Laçikany 6:1 hasabynda ýeňdi. Çärýek finalda bolsa ol Malaýziýanyň wekili Hari Sankar Sureýa Sankara garşy geçirilen duşuşykda ýeňildi. Daýanç Keletliýew 67 kilograma çenli agram derejesinde 1/8 finalda ýaryşy dowam etdirmek mümkinçiliginden mahrum boldy.
Suwda ýüzmekde hem Türkmenistanyň wekilleri öz netijelerini görkezdiler. 15 ýaşly Alan Muhin 100 metr erkin usulda ýüzmekde 53,69 sekunt netije görkezdi. 50 metr aralykdaky çykyşynda bolsa öz ýaryşynda birinji bolup, 23,91 sekunt wagt görkezdi. Waleriýa Mirenskaýa 200 metr toplumlaýyn ýüzmekde 2:43,30 netije bilen çykyş etdi. Dawid Akopýan bolsa 100 metr brass usulynda öz ýaryşynda ilkinji bolup pellehana ýetdi.
Boksda ýurdumyzyň ýygyndysynyň ilkinji wekili öňki Aziýa oýunlarynyň bürünç medalynyň eýesi Baýramdurdy Nurmuhammedow boldy. 70 kilograma çenli agram derejesinde çykyş edýän türgeniň ýaryşdaky ilkinji garşydaşy Bahreýniň wekili Ali Abdulla boldy.
Aziýa oýunlarynyň gerimi hem örän giň. Aichi-Nagoya 2026 ýaryşlaryna 45 Milli Olimpiýa komitetiniň wekilleri gatnaşýar. Türgenler 43 sport görnüşinde medallaryň 469 toplumy ugrunda bäsleşýärler.
Türkmenistanyň häzirki ýygyndysy üçin bu ýaryş diňe bir täze netijeler üçin mümkinçilik bolman, eýsem öňki Aziýa oýunlarynda gazanylan tejribäni dowam etdirmek üçin hem nobatdaky uly synagdyr. 2023-nji ýylda Hytaýyň Hançžou şäherinde geçirilen XIX Aziýa oýunlarynda türkmen türgenleri alty bürünç medal gazanypdy. Olaryň hatarynda Baýramdurdy Nurmuhammedow, Maýsa Pardaýewa, Aýnur Amanowa, Işanmyrat Ataýew, Döwletmyrat Orazgylyjow we Baýry Baýryýew bar.
Nagoýadaky ýaryşlaryň öňünde bolsa türkmen türgenleriniň çykyşlary dowam edýär. Türgenler üçin her duşuşyk täze tejribe, täze bäsdeşlik we öz mümkinçiligini görkezmek üçin nobatdaky pursat bolup durýar.
Maksat Begenjow,
Türkmenistanyň Telekommunikasiýalar we
Informatika institutynyň talyby
Çeşme: Altyn Asyr Türkmenistan
Teswirler