Sanly tehnologiýalar häzirki wagtda ykdysadyýetiň ösüşine täsir edýän esasy ugurlaryň birine öwrülýär. Şu ýylyň sentýabr aýynda Aşgabatda bu ugurdan tejribe alyşmaga we täze çözgütleri ara alyp maslahatlaşmaga gönükdirilen «Innowasiýalar we sanly tehnologiýalar ykdysady ösüşiň hereketlendiriji güýçleridir» atly ylmy-amaly maslahaty geçirmek meýilleşdirilýär. Bu barada Hormatly Prezidentimiziň sanly ulgam arkaly geçiren Ministrler Kabinetiniň nobatdaky mejlisinde habar berildi.
Forumyň dowamynda innowasiýalaryň milli ykdysadyýeti ösdürmekdäki orny, sanly ykdysadyýetiň geljekki ugurlary we dürli pudaklarda öňdebaryjy tehnologiýalary peýdalanmagyň mümkinçilikleri ara alnyp maslahatlaşylar.
Maslahatyň esasy temalarynyň arasynda elektron hökümet, emeli aň, maliýe tehnologiýalary we sanly hyzmatlar ýaly häzirki döwrüň möhüm ugurlary hem bar. Şeýle hem önümçilik işlerini döwrebaplaşdyrmak, iş proseslerini has netijeli guramak we sanly çözgütleriň ykdysady işjeňlige täsirini güýçlendirmek bilen bagly meseleler üns merkezinde bolar.
Sanly özgerişleriň diňe tehnologiýa bilen çäklenmeýändigi, eýsem täze hünärlere we döwrebap başarnyklara bolan zerurlygy hem artdyrýandygy bellenilýär. Şunuň bilen baglylykda, ýokary hünärli işgärleri taýýarlamak, ýaşlaryň sanly başarnyklaryny ösdürmek we halkara tejribäni öwrenmek hem maslahatyň möhüm ugurlarynyň biri hökmünde kesgitlenýär.
Soňky ýyllarda sanly hyzmatlaryň gündelik durmuşda we ykdysadyýetde eýeleýän ornunyň giňelmegi bu ugurda tejribe alyşmak üçin şeýle çäreleriň ähmiýetini has-da artdyrýar. Ylmy-amaly maslahatyň hem täze pikirleri ara alyp maslahatlaşmak, öňdebaryjy tejribeleri paýlaşmak we innowasion çözgütleriň mümkinçiliklerini öwrenmek üçin meýdança öwrülmegine garaşylýar.
Şeýle forumlar sanly ykdysadyýet, emeli aň we innowasiýalar ýaly çalt üýtgeýän ugurlarda täze başlangyçlaryň öňe sürülmegine hem-de tehnologiýanyň önümçilikden başlap hyzmatlar ulgamyna çenli dürli ugurlarda netijeli ulanylmagynyň ýollarynyň gözlenmegine mümkinçilik berýär.
Humaý Hallyýewa,
Türkmenistanyň Daşary işler ministrliginiň
Halkara gatnaşyklary institutynyň talyby
Teswirler