2026-njy ýylyň 6–8-nji maýy aralygynda Türkmenistanyň wekiliýeti Germaniýanyň Leýpsig şäherinde geçirilýän Halkara ulag forumynyň (ITF) ýyllyk sammitine gatnaşýar. Bu forum Azerbaýjanyň başlyklyk etmeginde geçirilip, onuň esasy temasy «Durnukly ulagy maliýeleşdirmek» bolup durýar. Şeýle hem bu çäre 2025–2027-nji ýyllar üçin niýetlenen ulag durnuklylygy boýunça üç ýyllyk maksatnamanyň möhüm bölegi hökmünde çykyş edýär.
Forumda ITF-e agza 69 ýurduň ulag ministrleri, iri kompaniýalaryň ýolbaşçylary, alymlar we halkara guramalaryň wekilleri bir ýere jemlenýärler.
Türkmenistanyň wekiliýetine «Türkmenhowaýollary» döwlet gullugynyň başlygynyň orunbasary Süleýman Durdyýew ýolbaşçylyk edýär. Şeýle-de wekiliýetiň düzümine Ministrler Kabinetiniň, Daşary işler ministrliginiň hem-de demir ýol ulaglary ulgamynyň wekilleri girýär.
Çäräniň dowamynda gatnaşyjylar ulag pudagyna maýa goýumlaryny çekmegiň mümkinçiliklerini, şeýle hem howanyň üýtgemegi, tebigy betbagtçylyklar, pandemiýalar, kiberhowplar we geosyýasy ýagdaýlar ýaly töwekgelçilikler şertinde ulag ulgamlarynyň durnuklylygyny üpjün etmegiň maliýe usullaryny ara alyp maslahatlaşýarlar.
Türkmenistanyň bu halkara foruma gatnaşmagy ýurduň ulag ulgamyny ösdürmek boýunça alyp barýan giň gerimli işleriniň dowamydyr. Ýurtda halkara ulag geçelgelerini ösdürmek, infrastrukturalary döwrebaplaşdyrmak hem-de ygtybarly üstaşyr-logistika ulgamyny döretmek boýunça giň möçberli işler alnyp barylýar.
Şeýle hem döwlet syýasatynda ulag diplomatiýasyna aýratyn ähmiýet berilýär. Türkmenistan sanly tehnologiýalary ornaşdyrmak, innowasiýalary ulanmak hem-de ekologiýa taýdan arassa ulag görnüşlerini ösdürmek ugrunda iş alyp barýar. Bu bolsa ýurduň Ýewraziýa giňişliginde möhüm üstaşyr merkez hökmünde ornuny has-da pugtalandyrýar.
Teswirler