2025-nji ýylyň 28-nji noýabrynda “Türki dünýäsiniň 2025-nji ýyldaky medeni paýtagty” bolan Aktau şäherinde TÜRKSOÝ-nyň Medeniýet ministrleriniň Hemişelik geňeşiniň 42-nji mejlisi geçirildi. Oňa Türkmenistanyň medeniýet ministri Atageldi Şamyradowyň ýolbaşçylygyndaky wekiliýet gatnaşdy. Mejlis dostluk ýagdaýynda geçip, türki döwletleriň medeni-ynsanperwer ugurlardaky hyzmatdaşlygynyň möhüm meseleleri giňişleýin ara alnyp maslahatlaşyldy. Bu barada Türkmenistanyň DIM-niň web-saýtynda bellenilýär.
Maslahatyň dowamynda TÜRKSOÝ-nyň Baş sekretarlygynyň geçen döwür boýunça hasabaty we maliýe hasabaty tassyklandy. Şonuň ýaly-da, medeni paýtagt maksatnamasynyň çäklerinde Gazagystan tarapyndan alnyp barlan işleriň netijeleri diňlenildi.
Geňeş Özbegistanyň Medeniýet ministrliginiň Andijan şäherini 2026-njy ýylyň “Türki dünýäsiniň medeni paýtagty” hökmünde hödürlän teklibini goldady we degişli çäreleriň maksatnamasyny kabul etdi. Mundan başga-da, Geňeş Guramanyň ösüşi boýunça resminamanyň taslamasyny taýýarlamak we ony agza ýurtlaryň degişli edaralaryna ugratmak barada Baş sekretariata tabşyryk berdi. Resminamanyň tassyklanmagy Geňeşiň indiki mejlisine meýilleşdirilýär.
Hemme agzalaryň teklipleri we Guramanyň däp bolan çäreleri esasynda TÜRKSOÝ-nyň 2026–2028-nji ýyllar üçin strategik resminamasy we 2026-njy ýyl üçin Iş maksatnamasy kabul edildi. Karara laýyklykda, 2026-njy ýyl üçin Wagtlaýyn utgaşdyryjy jogapkärçiligi Özbegistanyň Medeniýet ministrligine berildi, Geňeşiň 43-nji mejlisi bolsa Andijan şäherinde geçiriler.
“Aktau – Türki dünýäsiniň medeni paýtagty 2025” ýylynyň ýapylyş dabarasynda türki medeni mirasy görkezýän giň gerimli medeni çykyş guraldy. Şol wagtyň özünde 2026-njy ýylyň medeni paýtagtynyň ady resmi taýdan Andijana geçirdi. Türkmen wekiliýetiniň Aktaudaky mejlise gatnaşmagy ýurdumyzyň TÜRKSOÝ çäklerinde medeni hyzmatdaşlygy ösdürmäge we türki döwletler bilen ynsanperwer gatnaşyklary pugtalandyrmaga uly ähmiýet berýändigini görkezýär.
Hekimberdi PYGYÝEW,
Türkmenistanyň Döwlet energetika institutynyň
mugallymy.
Teswirler