Tähranda 16 ýurtdan, şol sanda Türkmenistandan 80-den gowrak hünärmeni jemlän Aziýada meşhur kabaddi oýny boýunça halkara eminler maslahaty geçirildi. Ony 30-dan gowrak ýurtdan milli assosiasiýalary birleşdirýän Aziýanyň Kabaddi federasiýasy (AKF) gurady.
Foruma halkara derejeli emin, Türkmenistanyň «Hanmudo» söweş sungaty federasiýasynyň (ol sportuň birnäçe görnüşini, şol sanda kabaddini hem birleşdirýär) başlygy Orif Buharakow, guramanyň baş sekretary Guwanç Gulgeldiýew we Mary welaýat boýunça Kabaddi federasiýasynyň wekili Nagmat Hojamämmedow dagy ýurdumyza wekilçilik etdiler.
Üç günüň dowamynda maslahata gatnaşyjylar kabaddi oýnunyň düzgünleri we beýleki taraplary boýunça okuwa we eminlik işini kämilleşdirmek boýunça amaly sapaklara gatnaşdylar. Maslahatyň jemleýji gününde synagdan üstünlikli geçen Türkmenistanyň wekilleri tomusky Aziýa oýunlarynyň maksatnamasyna girýän adaty (7×7), Aziýa kenarýaka oýunlarynyň meýilnamasyna goşulan (4×7) görnüşindäki kabaddi görnüşindäki (4×4), Ýapyk binalarda we söweş sungaty boýunça Aziýa oýunlarynyň maksatnamasyna girýän (5×5) we 10 oýunçydan ybarat toparlaryň oýnaýan kabaddi (aýlaw ugry) ýaly görnüşleriniň islendik halkara bäsleşigine eminlik etmäge hukuk berýän şahadatnama aldylar.
Ýeri gelende belläp geçsek, Türkmenistanda kabaddi hindi toparlaýyn oýny 1997-nji ýylda Adalat ministrliginde diňe bir koreý göreş ugruny däl, eýsem, uniwersal söweş, MMA söweş, el söweşi we harby el-aýak söweşi, şeýle hem kabaddi ýaly sportuň beýleki görnüşlerini wagyz edýän «Hanmudo» milli söweş sungaty federasiýasy hasaba alnandan soň ösdürilip başlady.
Häzirki wagtda bu oýun ýurduň ähli welaýatlarynda öwredilýär. Balkan we Daşoguz welaýatlarynyň sport mekdeplerinde kabaddi boýunça tälimçiler işleýärler. Ýurduň beýleki sebitlerinde sportuň bu görnüşini Türkmenistanyň «Hanmudo» söweş sungaty federasiýasynyň goldamagynda jemgyýetçilik esasda işleýän tälimçiler ösdürýärler.
Türkmenistanyň toparlary kabaddi boýunça Aziýa we dünýä çempionatlaryna birnäçe gezek gatnaşdylar, 2014-nji ýylda bolsa Inçhonda (Koreýa Respublikasy) geçirilen tomusky Aziýa oýunlarynda ilkinji gezek erkekleriň we zenanlaryň arasynda ýaryşlarda çykyş etdiler.
Arzuw ROZYMURADOWA,
Türkmenistanyň Döwlet energetika
institutynyň talyby.
Teswirler