Kazanyň A.N. Tupolýew adyndaky Milli ylmy-barlag tehniki uniwersiteti GDA ýurtlarynyň uçurym mekdep okuwçylarynyň arasynda ders olimpiadasynyň geçiriljekdigini yglan etdi. Bu barada Russiýanyň GDA-nyň, daşary ýurtlarda ýaşaýan watandaşlaryň işleri we halkara ynsanperwer hyzmatdaşlyk boýunça federal agentligi habar berýär.
Köp dersleri öz içine alýan Tupolýew halkara olimpiadasyna Türkmenistandan, Azerbaýjandan, Ermenistandan, Belarusdan, Gruziýadan, Gazagystandan, Gyrgyzystandan, Moldowadan, Täjigistandan we Özbegistandan mekdep okuwçylary gatnaşarlar. Olimpiadanyň ýeňijileri A.N. Tupolýew adyndaky Milli ylmy-barlag tehniki uniwersitetine okuwa girjek bolanlarynda artykmaçlyga eýe bolarlar.
Olimpiada fizika, matematika, informatika we rus dili dersleri boýunça geçiriler. Olimpiada gatnaşmaga isleg bildirýänler 30-njy aprele çenli şu salgy boýunça özlerini hasaba aldyrmalydyrlar. Olimpiadanyň saýlama tapgyry 1-nji fewral – 1-nji maý, deslapky tapgyry hem 1-nji maý – 20-nji iýun aralygynda geçiriler.
Maral AMANGELDIÝEWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler