10-njy fewralda Daşkent şäherinde Daşky gurşawy goramak we howanyň üýtgemegi boýunça Merkezi Aziýa uniwersiteti açyldy. Şol gün uniwersitetiň mejlisler zalynda BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahatynyň jemlerine bagyşlanyp Merkezi Aziýa sebit mejlisi geçirildi.
Mejlise Merkezi Aziýanyň bäş ýurdundan, şol sanda Türkmenistandan, halkara guramalarynyň we diplomatik wekilhanalaryň ýolbaşçylary, ylmy jemgyýetiň wekilleri, daşky gurşawy goramak boýunça işjeň wekiller we habar beriş serişdeleriniň ýolbaşçylary gatnaşdylar.
Mejlisiň dowamynda GIZ, USAID, ÝHHG, ICAT, Ýewropa Bileleşiginiň, Bütindünýä bankynyň, FAO-nyň, BMG-niň Ösüş maksatnamasynyň wekilleri çykyş etdiler.
“Ýaşyl” uniwersitetiň açylyş dabarasyna türkmen wekiliýeti hem gatnaşdy. Ýokary okuw mekdebiniň maksady ýerli, sebitleýin we global daşky gurşaw meselelerini netijeli dolandyrmak, ekologiýa we daşky gurşawy goramak babatynda sebitleýin hyzmatdaşlygy güýçlendirmek, ylmy we intellektual potensialy durmuşa geçirmekde innowasion pikirleri, tejribeleri we tehnologiýalary ornaşdyrmakdan ybaratdyr.
Ýeri gelende belläp geçsek, uniwersitet jemgyýetçilik ýokary bilim edarasy bolup, onuň işi “Hub and Spoke” ýörelgesine laýyklykda guralýar. Okuw sapaklary özbek, rus we iňlis dillerinde leksiýalar, laboratoriýa we aýry-aýry sapaklar, tankydy pikirleniş, meseleler we synaglar esasynda toparlarda amaly iş arkaly kredit-modul ulgamyny ulanyp geçirilýär.
Nyýazsoltan HALLYÝEWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler