Häzirki wagtda ýurdumyzda sanly innowasiýalar giňden ornaşdyrylyp, internetiň elýeterliligi üpjün edilýär. Programma-tehniki, maglumat serişdeleri ylym-bilim, saglygy goraýyş, ulag-aragatnaşyk, bank ýaly dürli ulgamlarda we senagatyň aýry-aýry pudaklarynda işjeň peýdalanylýar. Ýurdumyzda innowasion mümkinçilikleriň artdyrylyp, döwrebap kärhanalaryň döredilmegi diňe bir içerki bazaryň şeýle önümlere bolan isleglerini kanagatlandyrman, eýsem, jemi içerki önümde innowasion önümleriň möçberleriniň artmagyna, iş orunlaryň döredilmegine, ilatyň iş bilen üpjünçilik derejesiniň gowulanmagyna, ýurdumyzyň bäsdeşlige ukyplylygynyň ýokarlanmagyna oňyn täsirini ýetirýär.
Ýurdumyzyň orta, orta hünär we ýokary okuw mekdepleri kompýuterler, multimedia enjamlary, lingafon otaglary, internet ulgamy bilen üpjün edildi. Bu bolsa öz gezeginde, birnäçe işleriň ýeňilleşmegine, wagtyň tygşytlanmagyna, islendik wagtda, birnäçe ugra degişli maglumatlary çalt tapmaga mümkinçilik berýär. Bilim ulgamynda sanly tehnologiýaly enjamlaryň ornaşdyrylmagy ýaşlara daşary ýurt dillerini öwretmek babatda giň şertleri döredýär. Mugallymlaryň we talyplaryň daşary ýurt dillerini öwrenmekde dürli elektron gollanmalardan peýdalanmak mümkinçiligini artdyrýar.
Häzirki wagtda giňden ýaýbaňlanýan Internet torunyň üsti bilen döredilen maglumat portalyndan her bir talyp özüne gerekli bolan maglumatlary alyp, olardan peýdalanyp bilýär.
Gahryman Arkadagymyz: «Ýaşlar beýik maksada — ýurdumyzy bilimler mekanyna öwürmäge gönükdirilen beýik işlere gowy okamak, döredijilikli zähmet çekmek, gurmak, döretmek, ylym-bilim dünýäsine çuňňur aralaşmak bilen mynasyp goşant goşmalydyrlar» diýip, örän jaýdar belleýär.
Biz — ýaşlaryň giň dünýägaraýyşly, akyl taýdan kämil, ökde hünärmenler bolup ýetişmegimiz üçin tagalla edýän hormatly Prezidentimize köp sagbolsun aýdýarys.
Döwran ATAÝEW,
Türkmen döwlet binagärlik-gurluşyk
institutynyň talyby.
Teswirler