Nesilbaşymyz Oguz han ogullaryna: «Ogullarym! Bu meniň size iň soňky wesýetim: nesillere hemişe şu üç zady aýamagy sargyt ediň! Birinjisi — Watany, ikinjisi — ata-enäni, üçünjisi bolsa — aty» diýip wesýet edipdir. Bu mysal gamyşgulak bedewlerimize irki döwürlerden bäri belent sarpa goýulýandygyny, türkmeniň bedewini iň gymmatly baýlyklaryň hatarynda görýändigini aňladýar.
Halkymyzyň milli buýsanjyna we baýlygyna öwrülen gymmatlyklarynyň içinde ýyndamlykda, çalasynlykda, çydamlylykda, duýgurlykda we owadanlykda älem-jahany özüne bendi eden ahalteke bedewleri aýratyn orny eýeleýär. Türkmen öz atynyň kaddy-kamatynyň owadan, boýnunyň dik, döşüniň ýaýbaň, aýaklarynyň inçeden uzyn, bedeniniň ýüpek ýaly mylaýym bolmagy, teniniň şöhle saçyp durmagy, eýesiniň gözünden onuň niýetine düşünmegi üçin näçe yhlas, söýgi siňdirendir.
Behişdi bedewleriň gözelligi, çydamlylygy, asyllylygy, wepalylygy we duýgurlygy, türkmen atşynaslarynyň, seýisleriniň, seçgiçileriniň ýokary ussatlyk derejesi hemmeleri haýran galdyrýar. Ahalteke bedewleriniň Watany bolan Türkmenistan bilen atçylyk ulgamynda özara gatnaşyk etmäge gyzyklanma bildirýän daşary ýurtly hyzmatdaşlaryň sany barha artýar. 2010-njy ýylda Gahryman Arkadagymyzyň başlangyjy bilen döredilen we ştab-kwartirasy Aşgabatda ýerleşýän Halkara ahalteke atçylyk assosiasiýasynyň işi hem şu maksatlara gönükdirilendir.
Berkarar döwletiň täze eýýamynyň Galkynyşy döwründe behişdi bedewlerimiziň at-owazasyny dünýä ýaýmak, ussat atşynaslaryň sarpasyny belende galdyrmak ýaly asylly işleri üstünlikli durmuşa geçirýän türkmen halkynyň Milli Lideri Gahryman Arkadagymyzyň, hormatly Prezidentimiz Arkadagly Serdarymyzyň janlary sag, ömürleri uzak bolsun! Alyp barýan döwlet ähmiýetli işleri hemişe rowaçlyklara beslensin!
Jeren ÖRÄÝEWA,
Türkmenistanyň Döwlet energetika
institutynyň talyby.
Teswirler