Arkadagly Serdarymyzyň parasatly baştutanlygynda ýurdumyzda ynsan saglygyny goramak ugrunda uly işler amala aşyrylýar. Ýurdumyzda sagdyn durmuş ýörelgelerini durmuşa ornaşdyrmak bilen bagly kanunçylygyň döwrebaplaşdyrylmagy Garaşsyz Diýarymyzda ynsan saglygyny goramak, şeýle hem halkymyzyň sagdyn, bagtyýar durmuşda ýaşamagy üçin giň mümkinçilikleriň döredilýändigini aýdyň görkezýär. Berkarar döwletiň täze eýýamynyň Galkynyşy döwründe bu ugurda alnyp barylýan köptaraply işleriň täze derejä çykmagy bolsa aýratyn buýsançly ýagdaýdyr. Ýurdumyzyň saglygy goraýyş ulgamyny has-da döwrebaplaşdyrmagyň çäklerinde bejeriş-öňüni alyş işleriniň netijeliligini ýokarlandyrmak, derman senagaty we şypahana pudaklaryny kämilleşdirmek hem-de ösdürmek boýunça giň gerimli maksatnamalaýyn çäreler üstünlikli durmuşa geçirilýär.
Ýurdumyzda saglygy goraýyş ulgamyny ösdürmegiň kanunçylyk-hukuk binýadynyň üpjün edilmegine aýratyn üns berilýär. Ýurdumyzda raýatlaryň saglygynyň goralmagyna, jemgyýetde sagdyn durmuş ýörelgesiniň emele getirilmegine we ornaşdyrylmagyna gönükdirilen kanunlar kabul edilýär. «Saglyk» Döwlet maksatnamasynyň üstünlikli durmuşa geçirilmegi netijesinde bu günki gün ýurdumyzyň saglygy goraýyş edaralarynyň maddy-enjamlaýyn binýady dünýäniň iň ösen derejelerine ýetirildi.
Hormatly Prezidentimiz Serdar Berdimuhamedow döwlet Baştutany wezipesine girişmegi mynasybetli dabaradaky çykyşynda ýurdumyzda adam saglygynyň jemgyýetiň we döwletiň iň uly gymmatlygydygyny aýratyn nygtady. Hut şonuň üçin hem Diýarymyzda ilatyň saglygyny goramak, keselleriň öňüni almak, olary aradan aýyrmak, saglygy goraýşy we derman senagatyny dünýä derejesine laýyklykda ösdürmek boýunça giň gerimli işler amala aşyrylýar.
Guwançmuhammet ORAZOW,
Myrat Garryýew adyndaky
Türkmenistanyň döwlet lukmançylyk
uniwersitetiniň Harby meýdan hirurgiýa
kafedrasynyň 1-nji ýyl kliniki ordinatory.
Teswirler