2021-nji ýylyň noýabr aýynyň 30-na Türkmenistanyň Telekommunikasiýalar we informatika institutynda ýurdumyzyň ulag we aragatnaşyk toplumynyň hünärmenleriniň, professor-mugallymlaryň we talyplarynyň gatnaşmagynda ylmy-önümçilik maslahaty geçirildi. Maslahatda ýurdumyzda häzirki döwürde edara-kärhanalaryň sanly ykdysadyýete geçmek boýunça gazanan üstünlikleri, ylym-bilime açylan giň ýol, elektron senagatynda gazanylýan ýokary netijeler, alymlaryň aragatnaşyk pudagyndaky özgerişlere goşýan saldamly goşandy barada gürrüň berdiler. Ylmy-önümçilik maslahatyna gatnaşyjylar ulag we aragatnaşyk toplumynyň esasy ugurlaryny ösdürmegiň häzirki ýagdaýy, edara-kärhanalaryň işini mundan beýläkde ösdürmekde sanlaşdyrmak, kiberhowpsuzlygy üpjün etmekde döwrebap çemeleşmeler, sebitde halkara magistral göwrümini ösdürmek we sanly transformasiýany çaltlandyrmagyň ugurlary boýunça meseleler bilen çykyş etdiler.
Häzirki döwürde döwlet edaralarynyň hem-de kärhanalarynyň bir ýere jemlenen saýtlary her ministrligiň we pudaklaýyn edaralarynyň sanly ykdysadyýete geçmek boýunça anyk ugurlary barada maslahata gatnaşyjylar öz çykyşlarynda bellediler. Ýurdumyzyň ýokary okuw mekdeplerinde professor mugallymlara, hünärmenlere we talyplara niýetlenilen sanly bilim portallarynda uzak aralykdan bilim almak, elektron resminama dolanyşygy, ylmy işler, bäsleşikler, maslahatlar, okuw kitaplarydyr gollanmalary, sözlükler hem-de beýleki zerur maglumatlardan peýdalanmagyň ugurlary beýan edildi.
Häzirki wagtda aragatnaşyk operatorlarynyň ulanyjylara berýän hyzmatlary we olary giňeltmek arkaly girdejini artdyrmak bilen bagly meselelere hem seredildi. Esasan hem aragatnaşyk ulgamyna sanly tehnologiýalary giňden ornaşdyrylmagy arkaly häzirki zaman Call-merkezleriň hyzmatynyň spektoryny artdyrmak tehniki –ykdysady tarapdan amatly boljakdygy bellenildi. Call-merkezleri ulgamlaýyn düzüme birikdirilen sanly, kompýuter ulgamlary jemgyýetiň ösüşiniň möhüm şertine hem-de ykdysadyýetiň dürli pudaklarynyň işiniň netijeliligini ýokarlandyrjakdygy nygtalyp geçildi.
Maslahatyň ahyrynda ylmy-önümçilik maslahatyna gatnaşyjylaryň ählisi Türkmenistan döwletimiziň ulag we aragatnaşyk ulgamyny ösdürmekde taýsyz tagallalary edýän hormatly Prezidentimiziň jany sag, ömri uzak, tutumly işlerinde hemişe rowaçlyklar ýar bolmagyny arzuw etdiler!
Wepa GUÝŽOW,
Türkmenistanyň Telekommunikasiýalar we informatika
institutynyň mugallymy
Teswirler