“Apple”-iň esaslandyryjylary Stiw Wozniak we Stiw Jobs tarapyndan 1976-njy ýylda döredilen “Apple 1” kompýuteri ABŞ-daky auksionda 400 000 dollara satyldy. Seýrek duşýan Gawaýi koa agajyndan ýasalan kompýuter henizem işleýär. Tehnologiýa ägirtleriniň ilkinji önümi we toplum hökmünde satylan diňe 200 kompýuteriň biri bolup durýar. Bu kompýuter kollektorlar üçin möhüm ähmiýete eýe.
“Apple 1” kompýuterinden başga-da, auksionyň ýeňijisi “Apple” programma üpjünçiligi we ulanyjy gollanmasy bolan iki kasetany hem aldy. Jobs, Wozniak we Ronald Waýne 1976-njy ýylyň 1-nji aprelinde Kaliforniýadaky bir ussahanada “Apple”-i tasladylar.
“Apple 1”-iň önümçiligini maliýeleşdirmek üçin Jobs “VW Microbus”-ny, Wozniak “HP-65” kalkulýatoryny 500 dollara satdy. Auksionda satylan enjam iň köp girdeji gazanan “Apple 1” kompýuteri däl. 2014-nji ýylda başga bir “Apple 1” kompýuteri Nýu-Ýorkda geçirilen auksionda 905 müň dollara satyldy.
Kerwen AKMYRADOW,
Türkmenistanyň Telekommunikasiýalar we
informatika institutynyň talyby.
Teswirler