16-18-nji iýunda Türkmenistanyň Milli Geňeşiniň Mejlisiniň wekilleri Parlamentara Bileleşigiň (IPU) guramagynda onlaýn görnüşde geçirilen Elektron parlament boýunça 9-njy Bütindünýä maslahatyna gatnaşdy. Bu barada TDH habar berýär.
Maslahatyň gün tertibine innowasiýalary we sanly tehnologiýalary ulanmak arkaly parlamentara hyzmatdaşlygy ösdürmek bilen bagly meseleler girizildi.
Parlamentarileriň uzak aralykdan işlemegi üçin mümkinçilikleri döretmek, sanly ulgama geçmek we onuň artykmaçlyklary, parlamentara duşuşyklary koronawirus pandemiýasy döwründe giňden peýdalanylýan wirtual görnüşde guramak, kiberhowpsuzlygy üpjün etmek hem-de beýleki meseleler gyzyklanma bildirilip, ara alnyp maslahatlaşyldy.
Bütindünýä maslahata gatnaşyjylar Parlamentara Bileleşigiň çäklerinde netijeli hyzmatdaşlygy mundan beýläk-de ösdürmegiň, parlamentara gatnaşyklary hem-de özara bähbitli tejribe alyşmagy, şol sanda häzirki zaman ylmy tehnologiýalaryň gazananlaryny iş ýüzünde peýdalanmak boýunça hyzmatdaşlygy pugtalandyrmagyň zerurdygy barada garaýyşlaryny beýan etdiler.
Teswirler