Biz gündelik durmuşymyzda sowadyjyda azyk önümlerini ýerleşdirmek meselesi bilen häli-şindi ýüzbe-ýüz bolýarys. Göräýmäge islendik önümi islendik tekjede ýerleşdirseňem bolup duran ýaly. Sebäbi düşnükli, sowadyjy herhal azyk önümlerini ter saklaýmaly. Ýöne bu — ýalňyş pikir. Azyk önümlerini sowadyjynyň tekjelerinde ýerleşdirmegiň öz ugur-ýoly bar.
Sowadyjynyň ýokarky tekjelerinde içgiler, taýýar süýt we et önümleri ýerleşdirilse, ýerlikli bolar. Aralykdaky tekjelerde nahar taýýarlananda ulanmagy göz öňünde tutulýan azyk önümler ýa-da taýýar naharlar goýlup bilner. Aşaky tekje-de bolsa dogralan ýa-da üwelen etleri, balyk önümlerini ýerleşdirmek bolar.
Azyk önümlerini şeýle usulda ýerleşdirilmegi bakteriýalaryň we wiruslaryň bir önümden beýleki önüme geçmeginiň öňüni alar.
Sowadyjynyň iň aşagynda ýerleşýän tekje bolsa, gök önümler üçin niýetlenip, mi-wedir gök önümleri bu bölümde saklamak ýerlikli bolar.
Enjamyň sowadyjy we doňduryjy bölümleriniň sowuklyk derejesi yzygiderli barlanyp durulmalydyr. Sowadyjy 5 derejeden aşakda, doňduryjy bölümi bolsa, -18 derejede saklanylmalydyr. Sowadyjynyň içi hyryn-dykyn doldurylman 70 göterime çenli bolmagy sowadyjynyň ygtybarly işlemegine şert döreder.
Sowadyjynyň gapysynyň iç ýüzündäki tekjeler enjamyň sowuklyk derejesiniň iň pes ýeri bolansoň, ol ýerde tiz zaýalanýan azyk önümleri saklanylmaly däldir.
Sowadyjynyň et üçin ulanylýan tekjesi yzygiderli arassalanyp durulsa, artykmaç bakteriýalaryň we mikroorganizmleriň döremeginiň öňi alnyp bilner.
Doňy çözülen azyk önümlerini täzeden doňdurmak maslahat berilmeýär. Şeýle edilende, onuň ýokumlylyk gymmaty peselip, saglyk üçin peýdasy azalýar.
Sowadyjy bilen baglanyşykly biläýmeli ýene bir zat, ilki salnan önümler soňkulardan öň ulanylsa, ýerlikli hem peýdaly bolar.
Internet maglumatlary esasynda taýýarlan
Bäşim Rozynýazow,
S.A.Nyýazow adyndaky TOHU-nyň talyby.
Teswirler