Türkmenistanly mekdep okuwçylary «MEMORIAD – 2024 Bütindünýä Zehin Sportlary Olimpiadasyna» gatnaşmak üçin Dubaý şäherine ugradylar. Bu zehinli ýaşlar topary, «Kämil Bilim», «Bilim Ýoly» we «Altyn göreç» okuw merkezlerinde Anzan Mega Mental arifmetika maksatnamasy boýunça taýýarlyk geçip, ýurdumyzy ilkinji gezek şeýle abraýly ýaryşda wekilçilik ederler.
Olimpiada, dünýäniň 60-dan gowrak döwletinden 150-den gowrak saýlanan beýin türgenlerini özünde jemlär. 2006-njy ýylda esaslandyrylan «Memoriad», 2008-nji ýyldan bäri dünýäniň dürli şäherlerinde geçirilýän, ýatdan hasaplamak we beýleki zehin başarnyklary boýunça geçirilen ilkinji we ýeke-täk dörtýyllyk zehin sportlary ýaryşy bolup durýar. Ol dünýäniň ýatkeşlik, mental kalkulýasiýa we intellektual başarnyklar ugurlaryndaky iň abraýly hünärmenleri we ýeňijileri bilen tanalýar.
Türkmenistanyň topary olimpiadada bäş sany kategoriýada bäsleşer:
- Zehin senenamasy
- Flaş Anzan Marafony
- Ýatdan goşmak
- Ýatdan köpeltmek (8×8)
- Ýatdan kwadrat kök almak (6 belgili)
Türkmenistanyň toparyna jemi 17 dalaşgär we iki wekil gatnaşýar. «Kämil Bilim» hususy kärhanasynyň direktorynyň orunbasary Döwletmyrat Durdymämmedow hem «Memoriad Bütindünýä Zehin Sportlary Federasiýasynyň» Türkmenistandaky resmi wekili hem-de olimpiadanyň emin agzasy hökmünde bu möhüm ýaryşa gatnaşar.
«Memoriad – 2024» olimpiadasy 2024-nji ýylyň 4-11-nji noýabry aralygynda Dubaý şäherinde geçiriler. Bu çärede Ginnes rekordlar kitaby guramasynyň agzalary hem gatnaşyp, dünýä rekordlaryny goýmak we täzelemek ugrunda dürli synanyşyklara şaýat bolarlar.
Türkmenistanyň ýaş zehinleri bu taryhy ýaryşda üstünlik gazanmak maksady bilen Dubaýa ugraýarlar. Olaryň zähmetleriniň, tutanýerlilikleriniň we baýry taýýarlyklarynyň ýurdumyzyň adyny dünýä derejesinde şöhratlandyrmagyna uly umyt baglanylýar.
Teswirler