Halkara parahatçylyk we ynanyşmak ýylynda ynanyşmagyň we parahatçylygyň pugtalandyrylmagyna gönükdirilen çäreleriň ähmiýeti artýar. Bu nukdaýnazardan, medeni diplomatiýa — ýurtlaryň arasyndaky gatnaşyklaryň güýçli binýadyna öwrülýär. Şu günler Hytaý Halk Respublikasynyň Sian şäherinde geçirilen çäreler hem parahatçylygyň medeniýet arkaly dabaralanmagynyň beýany boldy.
Türkmenistanyň Hytaýdaky Medeniýet ýylynyň çäklerinde geçirilen medeni çäreleriň ikinji tapgyry halklaryň arasynda medeni köprüleriň has-da berkemegine hyzmat etdi. Türkmenistanyň sungat wekilleriniň gatnaşmagynda geçirilen çykyşlar diňe bir döredijilik taýdan baý däl, eýsem, ynsanperwer ýörelgeleriň dabaralanmagyna gönükdirilen çäre hökmünde hem aýratyn ähmiýete eýe boldy.
Sian şäheriniň abraýly medeni merkezleriniň birinde guralan çärede Türkmenistanyň hem-de Hytaýyň medeniýet we dolandyryş işgärleriniň, talyplaryň hem-de giň jemgyýetçiligiň gatnaşmagy medeniýetler aragatnaşygynyň giň gerimli giňişligini döretdi. Çykyşlaryň dowamynda parahatçylyk, dostluk we özara hormat baradaky çykyşlar bu günki gün dünýä jemgyýetçiliginiň iň möhüm gymmatlyklaryna öwrülen ýörelgeleri öňe sürdi.
Türkmen wekiliýetiniň ýerine ýetiren «Ýaşasyn parahat durmuş» atly hytaý dilindäki aýdymyň aýratyn ruhy ähmiýeti boldy. Bu çykyş diňe bir döredijilik däl, eýsem, halklaryň kalbyna aralaşýan mährem gatnaşygyň nyşany hökmünde giň seslenme döretdi. Iki ýurduň folklor çykyşlarynyň sazlaşykly utgaşmagy bolsa medeni özboluşlylygyň parahatçylyk bilen sazlaşykly baglanyşmagynyň nusgasyny döretdi.
Ýurduň medeniýetiniň, taryhynyň we häzirki döwrüniň giňden açylyp görkezilmegi bolsa gatnaşyjylarda türkmen halkynyň dost-doganlyk gatnaşyklaryna berýän bahasyny aýdyň görkezdi. Aýratyn hem, Aşgabat we Arkadag şäherleriniň keşbini açyp görkezýän surat sergisi häzirki zaman türkmen döwletiniň ösüş ýoluna bolan uly gyzyklanmanyň döremegine itergi berdi.
Bu çäre, esasanam, häzirki çylşyrymly halkara şertlerinde medeni gatnaşyklaryň dünýäde durnuklylygyň we birek-birege düşünişmegiň möhüm gurallarynyň biridigini ýene bir gezek görkezdi. Halklaryň dostlukly gatnaşyklaryny güýçlendirmäge gönükdirilen bu çäre parahatçylygyň diňe bir diplomatik däl, eýsem, ruhy-durmuş taýdan hem möhüm ýagdaý bolup durýandygyny subut etdi.
Türkmenistan tarapyndan ýokary derejede guramaçylyk bilen geçirilýän şeýle medeni çäreler halkara giňişlikde ynsanperwer diplomatiýanyň nusgalyk ýörelgeleriniň durmuşa geçirilýändigini görkezýär. Bu bolsa ýurdumyzda alnyp barylýan parahatçylyk söýüjilikli syýasatyň halkara derejesindäki täsirini has-da artdyrýar.
Şazada JUMAMURADOW,
Türkmen döwlet maliýe institutynyň
2-nji ýyl talyby.
Teswirler