Ekologiýa düşünjesini ösdürmek maksady bilen mekdep okuwçylary üçin Tebigat muzeýine gezelenç guraldy
AŞGABAT — Türkmenistanyň Medeniýet merkezi döwlet birleşiginiň düzümindäki Döwlet muzeýiniň Tebigat muzeýinde mekdep okuwçylary üçin täsirli we terbiýeleýji gezelenç guraldy. Bu çäre “Türkmenistanyň ekologiýa hereketi” jemgyýetçilik guramasy tarapyndan guramaçylykly geçirildi. Onuň baş maksady ýaş nesliň tebigata bolan söýgüsini ösdürmek we olaryň ekologiýa bilen baglanyşykly düşünjelerini giňeltmekden ybarat boldy.
Gezelenje Aşgabat şäherindäki mekdeplerden, şeýle-de welaýatlardan paýtagta tomusky dynç alyşa gelen okuwçylar gatnaşdy. Olar muzeýiň hünärmeni tarapyndan geçirilýän ýörite ekskursiýanyň çäginde eksponatlar bilen tanyşdylar.
Çagalar Ýeriň döreýişi, ýaşaýyş düzüminiň ösüşi, dünýäniň howa guşaklary, şeýle-de Türkmenistanyň daglyk, çöl, düzlük, köl, derýa we deňiz kenarýaka zonalarynyň aýratynlyklary bilen tanyşdylar. Ýurduň biologik köpdürlüligini, seýrek duş gelýän minerallary we gorag astyndaky tebigy sebitleri görkezýän bölümler aýratyn gyzyklanma döretdi.
Bu medeni-terbiýeçilik çäre ýaşlarda tebigata bolan söýgini ösdürmäge, olaryň ekologiýa taýdan sowatlylygyny ýokarlandyrmaga hem-de daşky gurşawy goramagyň ähmiýetini düşündirmäge gönükdirilendir.
Türkmenistanyň Döwlet muzeýi 1998-nji ýylyň 12-nji noýabrynda esaslandyryldy. Ol ýurduň taryhyny, tebigatyny, etnografiýasyny we häzirki ösüşlerini özünde jemleýän baý kolleksiýa eýedir. Muzeý ýaş nesli terbiýelemekde we ýurdumyzyň medeni hem tebigy mirasyny wagyz etmekde möhüm orun eýeleýär.
Has giňişleýin: museum.gov.tm
Teswirler