Häzirki wagtda tutuş dünýä boýunça global häsiýete eýe bolan meseleleriň biri-de ekologiýa abadançylygyny üpjün etmek meselesidir. Senagatlaşmagyň çalt depginde ösmegi we adamyň daşky gurşawa bolan köptaraplaýyn çemeleşmeleri ekologiýa abadançylygyny pugtalandyrmaklyga borçlandyrýar. Bu ugurda dünýäbelli meşhur şahsyýetler hem ekologiýa syýasatyny giňden goldamakda işjeň gatnaşýarlar. Geliň, şeýle şahsyýetleriň käbiri bilen tanyş bolalyň:
Leonardo Di Kaprio — dünýäbelli aktýor, ol daşky gurşawy goramak boýunça alnyp barylýan işleriň ýakyndan tarapdary bolup, şeýle işlere saldamly goşant goşýar. Ol energiýa pudagyndaky gözlegleri we özgertmeleri maliýeleşdirmek maksady bilen ýörite gazna hem döretdi. Şeýle hem ol ýitip gitmek howpy abanýan haýwan görnüşlerini goramaklyga hem işjeň gatnaşýar, haýwanlary goramak maksady bilen zerur ýerleri hem-de şertleri döretmekde yzygider maliýe goldawyny berýär. Netijede san taýdan azalýan haýwanlaryň goralýan ýerleriniň meýdany barha giňeldilýär.
Nikolaý Drozdow — Russiýa Federasiýasynyň telegepleşiklerini alypbaryjysy, alym hem meşhur zoolog hökmünde tanalmak bilen, ol tebigaty goramak babatdaky işlere, daşky gurşawy goramak boýunça möhüm taslamalarynyň durmuşa geçirilmegine işjeň gatnaşyjydyr. Ol telewideniýede ekologiýa syýasatyny kämilleşdirmek boýunça degişli nutuklar bilen yzygider çykyş edip, wagyz-nesihat işlerini alyp barýar, şeýle-de bir-birinden täsirli hem gyzykly ylmy telegepleşikleri we telefilmleri surata düşürýär.
Brijit Bardo — meşhur fransuz aktrisasy. Ol haýwanlary goramak boýunça halkara gaznasyny esaslandyryjy bolup, dürli egin-eşiklerde tebigy deriniň ulanylmagyna garşy çykýar.
Emma Wotson — hemmeleriň söýüp tomaşa edýän «Garri Potter» filminde Germionanyň keşbini ussatlyk bilen janlandyryp, dünýäde meşhurlyk gazanan aktrisadyr. Meşhur aktrisa kino äleminde zähmet çekmeklik bilen bir hatarda, daşky gurşawyň goragy babatda alnyp barylýan işlere işjeň gatnaşyp, degişli gaznalara maliýe kömegini berýär. Özi-de ekologik modanyň tarapdary bolup, sütük we deri önümlerinden ýüz öwrüp, tebigy ýa-da gaýtadan işlenen materiallardan tikilen egin-eşikleri geýýär.
Pirs Brosnan — Jeýms Bonduň keşbini ussatlyk bilen ýerine ýetiren aktýor hökmünde köpleriň aňynda orun alan meşhur aktýor. Ol Beýik Britaniýanyň tebigy baýlyklary goramak boýunça geňeşiniň hem agzasy bolup, ekologiýany giňden goldaýan tanymal şahsyýetleriň biridir.
Jonni Depp — meşhur aktýor hökmünde daş-töweregiň hapalanmagyna garşy geçirilýän dürli mitinglerde, konferensiýalarda işjeň çykyş edýär. Esasan hem ol energiýany tygşytlamagyň, daşky gurşawy aýawly saklamagyň hem-de ekologiýa taýdan arassa jaýlarda ýaşamagyň tarapdarydyr.
Ilýa Lagutenko — uzak Gündogaryň we Amur gaplaňlarynyň ýitip gitmegine garşy göreşýän Amur haýyr-sahawat gaznasyna howandarlyk edýär. Ol köplenç bu ugurda haýyr-sahawat çärelerini gurnaýar we tebigaty goramak barada aýratyn belläp geçýär.
Mukam BAÝRAMGELDIÝEW,
Türkmen oba hojalyk institutynyň 2-nji ýyl talyby.
Teswirler