2021-nji ýylyň 17-nji martynda paýtagtymyz Aşgabatda Türkmenistanyň Senagatçylar we telekeçiler birleşmesiniň döredilmeginiň 13 ýyllygy mynasybetli serginiň we birleşmäniň agzalarynyň maslahatynyň açylyş dabarasy boldy. Her ýylda bu birleşmäniň döredilen güni mynasybetli guralýan ýurdumyzyň senagatçylarynyň we telekeçileriniň sergisi hem-de birleşmäniň agzalarynyň maslahaty bagtyýarlyk döwrümizde hususy pudakda gazanylanlary giňişleýin açyp görkezýär. Söwda-senagat edarasynyň sergi jaýynda ýurdumyzda daşary ýurtlardan getirilýän harytlaryň ornuny tutýan önümçiliklerini giňeltmek we öndürilýän önümleriň eksporta iberilýän möçberlerini artdyrmak ugrunda yhlasly zähmet çekýän hususy telekeçilerimiz bilen söhbetdeş bolduk.
Söhbetdeşligimiziň başynda “Täze aý” hususy kärhanasynyň et we şöhlat konditer önümleriniň ýolbaşçysy Batyr Hojakow bilen kärhanada alnyp barylýan işler, şeýle-de öndürilýän önümleriň ilatymyzyň arasyndaky gymmaty barada berjek gürrüňleri bilen dowam edýäris:
– “Täze aý” kärhanalar topary- şöhlat önümleriniň, konditer we süýt önümleriniň hem-de ýarym taýýar et önümleriniň iň iri öndürijileriniň biri bolmak bilen azyk önümleriniň jemi 500-e golaý görnüşlerini öndürýär. Kärhanamyz hiliň ISO 9001:2015 halkara standartyna laýyklykda we azyk önümleriniň howpsuzlygyny dolandyrmagyň ISO 22000:2018, IFS halkara standartyna laýyklykda şahadatnamalar bilen sertifisirlenendir. Bu üýtgewsiz hili we önümçilikde häzirki zaman tehnologiýalarynyň howpsuz ulanylmagyny kepillendirýär. Biziň kompaniýamyz et önümleriniň bazarynda 2005-nji ýyldan bäri üstünlikli işläp gelýär. Bu günki günde önümiň 67-ä golaý görnüşi öndürilýär. Et önümini öndürýän kärhananyň taslama kuwwaty – bir iş döwründe 85 tonna bolup durýar. Biz içinde hakyky tagamly önüm, hat-da iň kiçi önüm salynýan islendik gaba nähili jogapkärçilik ýüklenýändigine gowy düşünýäris. Biz öz müşderilerimiziň isleglerini hemişe nazarda tutup, önümiň görnüşlerini hemişe täzeläp durýarys we onuň bezegini gowulandyrýarys. Pursatdan peýdalanyp, biz telekeçilere şeýle giň mümkinçilikleri döredip berýän hormatly Prezidentimize köp sagbolsun aýdýarys.
Biz söhbetdeşligimizi “Ajap önüm” hojalyk jemgyýetiniň hünärmeni Şatlyk Jommyýew bilen dowam edýäris. Ol türkmen bazarynda özleriniň alyp barýan işleri, şeýle-de GUNT tormoz kolodkalarynyň aýratynlyklary barada gyzykly maglumatlaryny biz bilen paýlaşar:
– “Ajap önüm” hojalyk jemgyýeti howpsuz ýol hereketi üçin berk we ýokary hilli tormoz kolodkalary öndürýär. Tebigata zyýansyz önümçilik kärhanamyzyň esasy üns merkezinde. Şonuň üçin hem önümlerimiziň we önümçilik tehnologiýalarymyzyň ekologik taýdan zyýansyz bolmagyna aýratyn ähmiýet berýäris. Esasy aýratynlyklarymyzyň ýene biri hem, Türkmenistanda ilkinji tormoz kolodkalary öndürýän kärhana bolmagymyzdyr. Biz asbestsiz keramiki we ýarym metal togtadyjy kolodkalary öndürmek üçin innowasion tehnologiýalary ulanýarys. GUNT tormoz kolodkalarynyň üstünde 2017-nji ýyldan bäri işleýäris we olar dürli howa şertlerinde ygtybarly duruzyjylygy, uzak ömürliligi we az tozaýyjy düzümi we berkligi bilen tapawutlanýarlar. Kolodkalarymyz 100% asbestsyz düzümi bilen optimal sessizligi hem-de gerekli ýerlerinde slotlar we ýiti burçlary ýylmanan bir şekilde öndürilýär. Her tormoz kolodkanyň demirleriniň goragy we daşky keşbi üçin ýokary hilli poroşok reňk bilen örtülýär. Biziň öňde goýan esasy wezipämiz önümleriň dürli görnüşleri bilen müşderilerimiziň talaplaryna jogap bermek, olaryň hoşallygyny gazanmak we ýurdumyzyň eksportyny ösdürmekde öz goşandymyzy goşmakdyr. Sözümiň ahyrynda ýurdumyzyň içerki bazarlaryny ýokary hilli taýýar önümler bilen üpjün etmekde telekeçileriň ornuna ýokary baha berýän Gahryman Arkadagymyzyň janynyň sag, ömrüniň uzak, il-ýurt bähbitli alyp barýan işleriniň mundan beýläk hem rowaçlyklara beslenmegini arzuw edýärin.
Söhbetdeş bolanlar:
Şeker HUDAÝBERENOWA, Güljahan BABAJANOWA,
Türkmenistanyň Daşary işler ministrliginiň
Halkara gatnaşyklary institutynyň talyplary.
Teswirler