2018-nji ýylda Aşgabatda geçen Agyr atletika boýunça Dünýä çempionatyna gatnaşan 45 kg agram kategoriýasynda türkmenistanly Ýulduz Jumabaýewanyň altyn medalynyň gowşuryş dabarasy boldy.
Öň bu kategoriýada taýlandly türgen Thunya Sukcharoen altyn medal gazanypdy. Emma bu türgeniň antidoping düzgünleri berjaý etmändigi anyklanyldy we diskwalifikasiýa edildi. Şeýlelikde öň kümüş medalyň eýesi bolan Ýulduz Jumabaýewa altyn medalyň eýesi boldy.
Dünýä agyr atletika federasiýasynyň resmi saýtynda sanaw täzelendi.
Aşgabat şäherindäki Olimpiýa şäherjiginde geçirilen Türkmenistanyň sport we bedenterbiýe institutynyň 5-nji ýyl talyby Ýulduz Jumabaýewanyň baýragynyň gowşuryş dabarasynda Türkmenistanyň Prezidenti Gurbanguly Berdimuhamedow gatnaşdy. Ýaş türgeniň baýragyny we Lexus LX570 Sport Plus kysmly awtoulag sowgadyny gowşurdy.
Berdimuhamedow şugünki dabaranyň ähmiýetine üns çekdi. Şeýle joşgunyň türkmen halkynyň sport taryhynda Altymyrat Orazdurdyýewiň agyr atletika boýunça dünýäniň 3 gezek çempiony bolanda, hem-de Marat Nyýazowyň 1960-njy ýylda geçirilen XVII Olimpiýa oýunlarynda sapançadan ok atmak boýunça kümüş medalyň eýesi, dünýäniň ýedi gezek, Ýewropanyň hem üç gezek çempiony bolanda başdan geçirendigini belledi.
Halkara agyr atletika federasiýasynyň (IWF) ýolbaşçysy Michael Irani we Halkara agyr atletika federasiýasynyň (IWF) kätibi, Aziýanyň agyr atletika federasiýasynyň baş sekretary Mohamed Hassan Jaloud medal gowşurylyş dabarasyna onlaýn görnüşde gatnaşdy.
Teswirler