Türkmenistanyň S.A. Nyýazow adyndaky oba hojalyk uniwersitetiniň talyby Dawut Döwletow Gazagystanda gurnalan abraýly bäsleşikde “Türki halklaryň iň gowy studenti” diýen ada mynasyp boldy. Bu bäsleşik Gazagystanyň “Bilim-orkenieti” atly milli innowasion ylmy-barlag merkezi tarapyndan guralyp, türki halklaryň ýurtlaryndan gatnaşyjylary bir ýere jemledi.
Dawut Döwletow bäsleşige örän gowy gatnaşdy. Onuň hödürlän materiallary sport, döredijilik we ylym boýunça gazanan üstünliklerini öz içine aldy. Bäsleşigiň dowamynda Dawudyň:
Dziudo we jiu-jitsu boýunça sport ýaryşlarynda gazanan diplomlary,
Poeziýa eserleri,
Döwlet we halkara derejesindäki bäsleşiklerde gazanan medallary eminiň ünsüni özüne çekdi.
Dawudyň üstünlige ýetmegine uniwersitetiň umumy himiýa kafedrasynyň mugallymy Kady Amanowyň uly goldaw berendigi bellärliklidir. Ol Dawudy ylmy taýýarlyk we şahsy ösüş babatda goldap, onuň öz başarnyklaryny has doly açmagyna ýardam etdi.
“Men üçin Türkmenistan adyndan çykyş etmek uly hormat. Bu ýeňiş meniň zähmet çekmegimiň, maşgalam, mugallymlarym we dostlarymyň goldawynyň netijesidir,” diýip Dawut ýeňşi bilen bagly pikirini paýlaşdy.
Dawudyň üstünligi türkmen ýaşlarynyň halkara derejesinde zehinleriniň we başarnyklarynyň ykrar edilýändigini görkezýär. Şeýle üstünlikler ýaş nesliň höwesini artdyrýar we olaryň has ýokary maksatlara ýetmegine ýol açýar.
Biz Dawudy gazanan üstünligi bilen gutlaýarys we oňa ylymda, sportda hem-de döredijilikde täze belentlikleri arzuw edýäris!
Teswirler