Hormatly Prezidentimiz Arkadagly Gahryman Serdarymyzyň «Magtymguly — dünýäniň akyldary» atly täze kitaby halkymyza ýapylan serpaý bolup, milli edebi mirasymyzy öwrenmekde gymmatly gollanmadyr. Magtymguly Pyragy türkmen halkyny berkarar döwlet gurup, agzybir ýaşaýşa çagyran nusgawy şahyrdyr. Adamzadyň şygryýet genji-hazynasyna uly goşant goşan beýik şahyryň şygyrlarynda beýanyny tapýan ynsanperwer garaýyşlar dünýä edebiýatçylarynyň, ýazyjy-şahyrlarynyň, pähim-paýhasa baý çeper söze hormat goýýan her bir adamyň ünsüni özüne çekip gelýär. Beýik söz ussadynyň ady bu gün bütin dünýäde giňden tanalýar, onuň ölmez-ýitmez goşgulary dünýäniň köp dillerinde neşir edildi. «Pähim-paýhas ummany Magtymguly Pyragy» ýylynda akyldar şahyrymyzyň mertebesi has-da belende göterildi.
Arkadagly Gahryman Serdarymyzyň jöwher paýhasyndan syzylyp çykan «Magtymguly — dünýäniň akyldary» atly täze kitaby hem söz ussadymyza goýulýan belent sarpadan nyşandyr. Şahyryň umumadamzat gymmatlygyna öwrülen pikir-garaýyşlary, köpugurly ideýalary nesiller üçin ruhlandyryjy güýç bolup hyzmat edýär. Hormatly Prezidentimiziň baý many-mazmunly kitabynda halkymyzyň asyrlardan gözbaş alyp gelýän medeni mirasyny, ruhy gymmatlyklaryny dikeltmekde, akyldar şahyrymyz Magtymguly Pyragynyň döredijilik mirasyny öwrenmekde, aýawly saklamakda, wagyz etmekde we geljek nesillere ýetirmekde ýurdumyzda maksatnamalaýyn işleriň durmuşa geçirilýändigi barada giňişleýin söhbet etmegi baky berkarar döwletimize, milli medeniýetimize, akyldar şahyrymyza bolan söýgimizi has-da artdyrýar.
Üç dilde — türkmen, rus we iňlis dilleriniň hersinde aýratyn kitap görnüşinde giň halk köpçüligine ýetirilen eserde Garaşsyz, hemişelik Bitarap döwletimiziň dünýä döwletleri, halkara guramalar bilen medeni gatnaşyklary ösdürmek, halklaryň arasynda dost-doganlygy, hyzmatdaşlygy berkitmek ugrunda edýän tagallalarynyň giňden beýan edilmegi buýsanjymyza buýsanç goşýar.
Goý, dünýä meşhur akyldar şahyrymyzyň sarpasyny belent tutup, milli edebi mirasymyzy gorap saklamak we içgin öwrenmek üçin halkymyza gymmatly eserleri peşgeş berýän Gahryman Arkadagymyzyň hem-de Arkadagly Gahryman Serdarymyzyň janlary sag, ömürleri uzak, beýik işleri rowaç bolsun!
Dünýägözel MUHANOWA,
Türkmenistanyň Döwlet energetika
institutynyň talyby.
Teswirler