Berkarar döwletiň täze eýýamynyň Galkynyşy döwrüniň «Pähim-paýhas ummany Magtymguly Pyragy» ýylynda Türkmenistan ýurdumyzda tennis boýunça «Ashgabat Open 2024» atly halkara ýaryşy geçirildi. Diýarymyzyň sport taryhynda möhüm waka bolan bu ýaryş sport ulgamynda halkara hyzmatdaşlygy pugtalandyrmaga, parahatçylygy we dostlugy dabaralandyrmaga, köpçülikleýin bedenterbiýäni wagyz etmäge ýaş türgenleriň ussatlyklaryny açyp görkezmäge uly goşant bolup hyzmat etdi.
Ýewropa we Aziýa döwletleriniň, ýagny Türkmenistandan, Beýik Britaniýadan, Hindistandan, Eýrandan, Iordaniýadan, Gazagystandan, Malaýziýadan, Birleşen Arap Emirliklerinden, Pakistandan, Täjigistandan, Türkiýeden, Özbegistandan wekilçilik edip ýurdumyza gelen 14 ýaşa çenli türgenleriň arasynda geçirilen tennis boýunça «Ashgabat Open 2024» halkara ýaryşy alty günüň dowamynda Olimpiýa şäherçesiniň Tennis toplumynda geçirildi. Ýokary guramaçylyk ýagdaýynda geçen ýaryşda ýurdumyzyň tennisçileri ýaryş maksatnamasynyň iki görnüşinde hem birinji we ikinji orunlary eýelemegi başardylar. Ýagny «Ashgabat Open 2024» ýaryşynyň maksatnamasynyň dört görnüşiniň jemleri boýunça ildeşlerimiz baýrakly orunlaryň 8-sini eýelediler. Çünki ýurdumyzda sportuň tennis görnüşini ösdürmäge uly üns berilýär, bu ugurda amatly şert-mümkinçilikleri döredilýär.
Ýaryşyň dowamynda ýeňijilere we baýrakly orunlary eýelänlere Aziýanyň Tennis federasiýasynyň medallarydyr şahadatnamalary, hormatly Prezidentimiz Arkadagly Gahryman Serdarymyzyň we Milli Liderimiz Gahryman Arkadagymyzyň adyndan gymmat bahaly sowgatlar dabaraly ýagdaýda gowşuryldy. Türkmen tennisçileriniň bu gazanan üstünlikleri, şeýle-de ýakynda häzirki zaman sport desgalaryny özünde jemleýän Olimpiýa şäherçesindäki Tennis toplumynyň Aziýanyň Tennis federasiýasy tarapyndan «Tennis boýunça Aziýa sebitiniň okuw-türgenleşik merkezi» diýlip ykrar edilmegi, GDA-nyň Hökümet Baştutanlarynyň Geňeşiniň 24-nji maýda geçirilen nobatdaky mejlisinde paýtagtymyzyň «Arkalaşygyň täze sport mümkinçilikleriniň şäheri» diýlip yglan edilmegi ata ýurdumyzda sporty ösdürmek boýunça uly işleriň durmuşa geçirilýändiginiň aýdyň beýanydyr. «Ashgabat Open 2024» ýaryşyna gatnaşyjylar üçin ýörite medeni maksatnama taýýarlanylyp, halkymyzyň baý taryhy mirasy, milli däp-dessurlary, köpçülikleýin bedenterbiýe hem sport bilen meşgullanmak üçin giň mümkinçilikler döredilen ak mermerli paýtagtymyz Aşgabadyň ajaýyplygy, gözellikleri bilen tanyşmaga mümkinçilik döredildi.
Umuman, türkmen sportuna bolan belent buýsanjyny artdyran bu iri halkara ýaryş Gahryman Arkadagymyzyň asylly başlangyçlaryny mynasyp dowam etdirýän Arkadagly Gahryman Serdarymyzyň parasatly baştutanlygynda ýurdumyzyň halkara derejesindäki iri ýaryşlary üstünlikli geçirýän ýurtdugyny aýdyň äşgär etdi.
Firuza DOSÇANOWA,
Türkmen oba hojalyk institutynyň talyby.
Teswirler