Berkarar döwletiň täze eýýamynyň Galkynyşy döwründe ata Watanymyzda beýik söz ussady Magtymguly Pyragynyň baý edebi mirasyny öwrenmek we bütin dünýäde wagyz etmek boýunça giň gerimli işler alnyp barylýar. Tutuş adamzadyň ruhy medeniýetiniň hazynasyna giren, ýaşlarda ýokary ahlaklylyk, ynsanperwerlik, watançylyk, halallyk duýgularyny terbiýelemegiň düýp binýadyny emele getirýän dana şahyryň edebi döredijiligi “Pähim-paýhas ummany Magtymguly Pyragy” ýylynyň belent şygarynyň many-mazmunyny belende götermäge, ýurdumyzy mundan beýläk-de gülledip ösdürmekde uly üstünlikleri gazanmaklyga ruhlandyrmaga uly itergi berýär. Belli bolşy ýaly, şu ýylda beýik akyldaryň doglan gününiň 300 ýyllygy mynasybetli guraljak dabaralaryň çäklerinde gözel paýtagtymyz Aşgabadyň günorta böleginde gurlan Magtymguly Pyragy medeni-seýilgäh toplumy akyldar şahyryň we beýik filosofyň ömür-döredijilik mirasyna goýulýan çuňňur hormatyň aýdyň nyşanydyr. Toplumyň çäginde dünýä ýurtlarynyň hem meşhur şahsyýetleriniň, belli ýazyjy-şahyrlarynyň, söz ussatlarynyň heýkelleri oturdylmagy dost-doganlygyň, hoşniýetli goňşuçylygyň dabaralanýandygynyň özboluşly güwäsi bolar. Esasy bellemeli zat hem, Magtymguly Pyragynyň golýazmalar toplumy BMG-niň Bilim, ylym we medeniýet meseleleri boýunça guramasy bolan ÝUNESKO-nyň «Dünýäniň hakydasy» maksatnamasynyň halkara sanawyna girizilip, şahyryň doglan gününiň 300 ýyllygy 2024-2025-nji ýyllarda ÝUNESKO bilen bilelikde bellenilip geçiljek şanly seneleriň sanawyna goşuldy. Türki medeniýetiň halkara guramasy (TÜRKSOÝ) tarapyndan 2024-nji ýyl «Türki dünýäsiniň beýik şahyry we akyldary Magtymguly Pyragy ýyly» diýlip yglan edildi. Hormatly Arkadagly Gahryman Serdarymyz Magtymguly Pyragynyň baý edebi mirasyny öwrenmek, dünýä jemgyýetçiligine wagyz etmek boýunça uly işleri alyp barylýandygyny belläp, «Türkmenistanyň «Magtymguly Pyragynyň 300 ýyllygyna» atly ýubileý medalyny döretmek hakynda» Türkmenistanyň Kanunyna gol çekdi. «Pähim-paýhas ummany Magtymguly Pyragy» ýylynda Gündogaryň beýik akyldary dana Pyragynyň ýubileýi mynasybetli dürli çäreleriň diňe bir biziň ýurdumyzda däl, eýsem dünýäniň ençeme döwletlerinde-de geçirilýändigini bellemek gerek. Şeýle asylly çäreler beýik söz ussadynyň şan-şöhratyny artdyrmaga, onuň edebi döredijiligini dünýä jemgyýetçiligine giňişleýin tanatmaga we özboluşlylygyny açyp görkezmäge, netijede bolsa parahatçylyk, dost-doganlyk medeniýetini ösdürmegiň möhüm şerti bolup durýan netijeli halkara gatnaşyklary pugtalandyrmaga giň mümkinçilik açýar.
Ruslan ŞOWKATOW,
Daşoguz şäheriniň 2-nji çagalar
sungat mekdebiniň mugallymy.
Teswirler