Berkarar döwletiň täze eýýamynyň Galkynyşy döwründe Hormatly Prezidentimiziň alyp barýan umumadamzat bähbitli başlangyçlarynda Magtymguly Pyragynyň baý döredijilik dünýäsini halkara giňişlikde wagyz etmek işleri möhüm orny eýeleýär. Magtymguly Pyragynyň doglan gününiň 300 ýyllygy mynasybetli ýurdumyzda we daşary ýurtlarda beýik akyldaryň edebi mirasyna bagyşlanan çäreler üstünlikli geçirilýär. Türki medeniýetiň halkara guramasy tarapyndan 2024-nji ýyl «Türki dünýäniň beýik şahyry we akyldary Magtymguly Pyragy ýyly», diýip yglan edildi. ÝUNESKO-nyň Ýerine ýetiriji geňeşi tarapyndan dana Pyragynyň golýazmalar ýygyndysyny «Dünýä hatyrasy» atly halkara sanawa goşmak barada hem karar kabul edildi.
Ata Watanymyzda beýik şahyr hem akyldar Magtymguly Pyragynyň doglan gününiň 300 ýyllygy mynasybetli guraljak çäreleriň çäklerinde Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty tarapyndan «Pähim-paýhas ummany Magtymguly Pyragy» atly halkara ylmy maslahata taýýarlyk görülýär. Eziz ýurdumyzyň görnükli alymlary, professor-mugallymlary, ýaş alymlary bilen bir birlikde, BMG-niň Bilim, ylym we medeniýet meseleleri boýunça guramasy bolan ÝUNESKO-nyň, TÜRKSOÝ-yň wekilleriniň, dünýä ýurtlarynyň 34-den alymlaryň, magtymgulyşynaslaryň işjeň gatnaşmaklaryna garaşylýar.
Bular blen birlikde, dünýäniň iri halkara guramalary biziň ýurdumyzyň Gündogaryň beýik akyldary Magtymguly Pyragynyň mirasyny ebedileşdirmek ugrundaky tagallalaryny goldaýarlar. Bilelikdäki tagallalaryň çäginde Türkmenistan we ÝHHG Magtymguly Pyragynyň doglan gününiň 300 ýyllygy bellenýän ýylda akyldar şahyryň mirasyny dünýä ýaýmak boýunça zerur çäreleri ýola goýulýar.
Bularyň ählisi bolsa, türkmen halkynyň beýik ogly, dana akyldar Magtymguly Pyragynyň doglan gününiň 300 ýyllyk şanly toýuna diňe bir dünýä ýurtlary tarapyndan däl, eýsem şahyryň döredijilik äleminiň gadyr-gymmatyna dünýäniň abraýly hem iri halkara guramalary tarapyndan-da giňden ähmiýet berilýändiginiň aýdyň beýanydyr.
Firuza DOSÇANOWA,
Türkmen oba hojalyk institutynyň talyby.
Teswirler