1 — 11-nji fewral aralygynda Tähranda geçirilen 42-nji «Fajr» halkara film festiwalyna Oguzhan adyndaky «Türkmenfilm» birleşiginiň wekili, kinorežissýor Sahysalyh Baýramow hormatly myhman hökmünde gatnaşdy. Bu «Fajr» kinofestiwaly her ýyl Eýran Yslam Respublikasynyň Milli baýramçylygy — Ynkylap güni mynasybetli geçirilýär.
Bu ýyl festiwala 87 ýurtdan 621 sany arzalar gelip gowuşdy. Bäsleşik maksatnamasynyň netijelerine görä, ýeňijiler üç ugur boýunça kesgitlenildi: «Sodaye-Simorgh» (festiwalyň esasy bäsdeşlik bölümi), täze režissýorlar we «Animasiýa».
Forumyň dowamynda daşary ýurt kino pudagynyň wekilleri kino sungatynyň ösüşiniň geljegini ara alyp maslahatlaşdylar we geljekdäki taslamalary durmuşa geçirmegiň mümkinçiliklerine göz aýladylar.
Ýatladyp geçsek, mundan bir ýyl öň, Birinji Halkara Hazar film forumynda Russiýanyň, Gazagystanyň, Azerbaýjanyň, Eýranyň we Türkmenistanyň kino pudagynyň hünärmenleriniň arasynda Hazarýaka ýurtlarynda kino sungaty boýunça özara maslahat geçirildi.
Forumyň netijelerine esaslanyp, umumy medeni giňişligi gorap saklamak we berkitmek, bilelikdäki film taslamalaryny döretmek, kinematografiýa pudagynda iň oňat tejribe alyşmak, şol sanda kino önümçiligi, kino bilimi we ýaş hünärmenlere goldaw bermek baradaky teklipler kabul edildi.
Bägül AGAJANOWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler