«Pähim-paýhas ummany Magtymguly Pyragy ýyly» mynasybetli Arkadag şäheriniň Taryhy we ülkäni öwreniş muzeýinde akyldar şahyr Magtymguly Pyragynyň dünýä edebiýatynyň altyn hazynasyna giren gymmatly edebi mirasyny öwrenmek hem-de halk köpçüligine wagyz etmek maksady bilen «Milli mirasymyza sarpa» atly sergi guraldy.
Sergide Magtymguly Pyragynyň ýaşan döwründe halkyň ýaşaýyş durmuşyndan söz açýan milli gymmatlyklar ýerleşdirildi. Muzeý gaznasyndan guralan sergide milliligiň nusgasy bolan türkmen halylary, şaý-sepleri, gadymy küýzeler we nakgaş eserleri, şeýle hem muzeý gaznasynda saklanýan milli gymmatlyklar görkezildi.
Serginiň açylyş dabarasyna Arkadag şäherinde zähmet çekýän birnäçe hünärmenler hem-de Türkmen döwlet oba hojalyk uniwersitetiniň mugallymlarydyr talyp ýaşlary gatnaşdylar.
Aýgül DÖWLETMYRADOWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler