Şu ýylky geçirilen robotika festiwalynyň öňkülerden tapawutlanýan taraplary bar. Türkmenistanyň Bilim ministrliginiň guramagynda geçirilen bu ýylky tehnologiýa şüweleňine diňe bir Aşgabat şäherinden däl, şeýle-de ýurduň beýleki welaýatlarynyň mekdep okuwçylary çykyş etdi. Çagalaryň hukugyny goramak we olaryň ösüşini goldamak boýunça dünýäniň iň iri guramasy bolan ÝUNISEF hem hyzmatdaş hökmünde gatnaşdy.
Dabarada ýörite çagalaryň işjeňligi aýratyn üns çekdi. Ahal welaýatynyň Saglygy dikeldiş okuw-terbiýeçilik toplumynda bilim alýan okuwçylar robototehnika ýaryşlaryna gatnaşdy. Şeýle-de öz mekdepleriniň tanyşdyryş sergi nokadynda myhmanlara maglumat berdiler.
Okuw-terbiýeçilik toplumynyň sergi nokadynda körler üçin ýörite okuw esbaplarynyň, kitaplaryň, kömekçi gurallaryň birnäçesi görkezilipdir. Bu toplumda bilim alýan çagalar üçin degişli şertler ýokary derejede gurnalypdyr. Göreji pes çagalar üçin topluma giren pursatyndan öz synp otagylaryna, medeniýet merkezlerine, aşhana, we beýleki nokatlara hiçhili kynçylyk çekmän barmaga mümkinçilik bar. Binanyň koridorlarynda we otaglarynda pollaryň üstünde ýörite gabaryk şekilli keramikalar bilen guralan. Bu keramikadaky şekilleri aýak bilen üstünden basylanda arkaýyn duýup, saýhallap bolýar. Şol gabaryk şekiller toplum boýunça ýol görkezýär.
Festiwala gatnaşan çagalaryň aýtmaklaryna görä, käbir çagalaryň göreji pes hem bolsa, ýatkeşlikleri örän ýiti we güýçli bolýan eken. Bu çagalaryň daşary ýurt dilleriniň birnäçe örän gysga wagtda öwrenmäge ukyplary bar. Aşgabat şäherinde hereket edýän möhletli okuw merkezleri bolsa, ýörite çagalar üçin öz okuwlaryny tölegsiz hödürleýän eken.
Bu ýerde bir zada göz ýetirip bolýar: aslynda böwet diýip zat ýok, her adam üçin tapawutly çemeleşme bar. Ýagny biri gidýän ugruny gözi bilen görýän bolsa, beýlekisi aýagynyň aşagyndaky ýolbelet daşlaryň kömegi bilen, biri kitaby seredip okaýan bolsa, ýene biri barmaklarynyň ujy bilen okaýar. Umuman, jemgyýetiň her bir agzasyna özboluşly şertler döredilende, hiçhili böwet bolmaýar.
Merdan Ataýew
Teswirler