Diýdiler: “Dünýäde nämedir gyt zat?”
Üç gezek diýdiler: “Ussat, ussat, ussat”
“Näçe gyt bolsa-da, ussat” – diýdiler,
“Çyn şägirt ondanam gyt zat” – diýdiler.
Bu setirler ussat şahyr, Kerim Gurbannepesowyň ötgür galamyndan çykan setirler. Elbetde, ussat diýlende ilki bilen ussat aktýor we dramaturg Bazar Amanow ýadyňa düşýär. Ussat halypa – Bazar Amanow 1908-nji ýylda Ahal welaýatynyň 1-nji Babadaýhan obasynda dünýä inýär. Ol heniz 3 ýaşyndaka, ýagny, 1911-nji ýylda ejeden we kakadan jyda düşüp, ýetim galýar. Enäniň-atanyň mährinden mahrum bolan ýaş Bazar, 1923-nji ýyla çenli onuň-munuň gapysynda hyzmat edip gezipdir.
Ýetimligiň, garyplygyň agyr keşgini gerdeninde göterip ýören ýaş ýigit, nädip şeýle ýokary derejelere ýetdi? Bu soragyň jogaby siziň ähliňizi hem gyzyklandyrýan bolsa gerek. Men oturyp bu soragyň jogabyny gözledim. Bu soragyň jogaby meni “Yhlasa – myrat” diýen pähimli sözlere golaýlaşdyrdy. Ussat aktýor hem dramaturg Bazar Amanow ýokary okuw jaýyny tamamlap, eline diplom alan şahsyýet däl. Emma, onuň ýiti zehini, aktýorçulyga bolan höwesi öz geljeginiň ýoluny röwşen ýagtylandyrdy. Onuň ýazan “Mollanepes”, “Jadyly nagyşlar”, “Kemine”, “Aýazhan”, “Hazynalar adasy”, şeýle-de, Garaja Burunow bilen bilelikde ýazan “Keýmir kör”, pýessalary sahnada goýuldy. Bu sahna eserleri hem örän şowly çykdy we tomaşaçylaryň gyzgyn söýgüsini gazandy. Aýratyn-da, onuň “Keýmir kör” pýessasy ýatda galan sahna eseridir.
Eziz okyjym! Siz häzir pikir edýänsiňiz: “Näme üçin Bazar Amanowyň ömri barada makala ýazdyka?” diýip. Men bu sowala sada jogap berýärin. Men özümi Bazar Amanowyň ýaş şägirdi diýip, hasap edýärin. Çünki onuň ýazan pýessalary maňa köp zady maslahat berýär. Onuň öz durmuşyndaky wakalar bolsa, maňa ähli işimde yhlasly bolmagy öwredýär. Aýratyn-da, onuň ýazan “Mollanepes” pýessasyny diňe men däl, örän köp kişi özüne ýakyn hasaplaýar. Çünki bu pýessa, hem bilimli bolmagy, hem-de päk söýgiňe wepaly bolmagy ündeýär.
Bazar Amanow ussat dramaturg hem aktýor. Men bolsa onuň okyjysy hökmünde, Bazar Amanowyň ýeten derejesine ýetmegi arzuw edýärin we onuň ömür arabasynyň yzyny yzarlap, şol derejä ýetjekdigime ýürekden ynanýaryn.
Kitaplaňdan öwüt alsam,
Setirleriň dür manyly.
Meniň hijem armanym ýok,
Bolsam bolýa siziň ýaly.
Feride HOJAÝEWA,
Ýagşygeldi Kakaýew adyndaky halkara
Nebit we gaz uniwersitetiniň talyby.
Teswirler