Sanly tehnologiýalaryň we emeli aňyň çalt ösýän häzirki döwründe ykdysadyýetiň we hasapçylygyň kämilleşmegi jemgyýetçilik guramalarynyň öňünde dübünden täze wezipeleri goýýar. Bütindünýä ykdysady forumynyň maglumatlaryna görä häzirki wagtda dünýä boýunça maliýe we hasaplaşyk amallarynyň 80%-den gowragy sanly ulgama geçirildi we bulutly (cloud) tehnologiýalar arkaly dolandyrylýar. Sanly hasaplaşyk diňe bir kagyz amallaryny azaltmak bilen çäklenmän eýsem maliýe maglumatlarynyň takyklygyny hem-de howpsuzlygyny üpjün etmegiň iň netijeli guralyna öwrülýär. Halkara hasapçylar federasiýasynyň geçiren barlaglaryna görä awtomatlaşdyrylan ulgamlaryň ornaşdyrylmagy adam faktory sebäpli ýüze çykýan mehaniki ýalňyşlyklary 95%-e çenli azaldýar we hasabatlary taýýarlamagyň wagtyny 40% tygşytlaýar. Häzirki zaman buhgalteriýasynda blokçeýn (blockchain) we emeli aň (AI) esasyndaky innowasion programmalaryň ulanylmagy maliýe seljermelerini has çuňňur hem-de gysga wagtda geçirmäge mümkinçilik berýär. Bu bolsa öz gezeginde jemgyýetçilik guramalarynyň maliýe durnuklylygyny berkitmäge we ýaşlar syýasatynyň maksatnamalaýyn çäreleriniň maliýe binýadyny has dogry meýilleşdirmäge ýardam edýär. Döwrebap maliýe dolandyryşynda innowasiýalaryň orny barha artýar we halkara tejribede sanly hasaplaşyga geçýän edaralaryň iş netijeliliginiň ortaça 25% ýokarlanýandygy anyk faktlar bilen subut edilýär. Şonuň üçin hem ykdysady ugurdaky ylmy çemeleşmeler we döwrebap sanly gurallary öwrenmek işgärleriň hünär derejesiniň yzygiderli ýokarlanmagyna hem-de milli sanly ykdysadyýete geçişiň has-da çaltlanmagyna uly goşant goşýar.
Aýjahan Rasulowa
Türkmenistanyň Magtymguly adyndaky Ýaşlar guramasynyň
Mary welaýatynyň Tagtabazar etrap geňeşiniň uly buhgalteri.
Teswirler