Häzirki döwrüň talaby ykdysady ösüşde diňe içerki mümkinçiliklere daýanman, dünýä tejribesini öwrenmegi we ony milli aýratynlyklara laýyklykda uýgunlaşdyrmagy göz öňünde tutýar Türkmenistan hem hut şu ýörelgä esaslanyp, hormatly Arkadagymyzyň hem-de Arkadagly Gahryman Serdarymyzyň üstünlikli dowam etdirýän döwlet syýasatynda daşary ýurtlaryň öňdebaryjy ykdysady tejribelerini öwrenmäge we olary milli ösüş modeline sazlamaga aýratyn ähmiýet berýär. Şeýle çemeleşme ýurduň ykdysadyýetiniň durnukly, bäsdeşlige ukyply we uzak möhletleýin ösüşini üpjün etmegiň möhüm şerti bolup durýar.
Daşary ýurt tejribeleri ykdysadyýetiň diwersifikasiýasy ugrunda aýratyn ähmiýete eýedir. Köp ýurtlaryň tejribesi diňe bir ugra daýanýan ykdysadyýetiň töwekgelçilikli bolup bilýändigini görkezýär. Şonuň üçin Türkmenistan senagat, oba hojalygy, ulag-logistika, energetika we hyzmatlar ulgamlarynda öňdebaryjy tejribeleri öwrenip, täze önümçilikleri ösdürmäge we ykdysady gurluşy giňeltmäge gönükdirilen çäreleri amala aşyrýar. Bu bolsa milli ykdysadyýetiň daşarky täsirlere garşy durnuklylygyny güýçlendirýär.
Senagat pudagynda daşary ýurtlaryň tejribesi Türkmenistanda täze tehnologiýalaryň giňden ornaşdyrylmagyna mümkinçilik berýär. Döwrebap önümçilik usullary, sanly dolandyryş ulgamlary we ýokary tehnologiýaly enjamlaryň ulanylmagy önümleriň hilini ýokarlandyrýar hem-de çykdajylaryň azaldylmagyna ýardam edýär. Şeýlelikde, milli senagat pudagy halkara bazarlarda bäsdeşlige ukyply önümleri öndürmäge şert döredýär.
Bilim we işgär taýýarlygy ulgamynda hem daşary ýurt tejribelerine aýratyn üns berilýär. Ösen ýurtlaryň tejribesi ýokary hünärli işgärleriň ykdysady ösüşiň esasy hereketlendiriji güýjüdigini tassyklaýar. Şonuň üçin Türkmenistan ýaşlaryň hünär derejesini ýokarlandyrmaga, häzirki zaman ykdysady şertlerine laýyk kadrlar taýýarlamaga we öňdebaryjy bilim usullaryny ornaşdyrmaga uly ähmiýet berýär. Bu bolsa milli ykdysadyýetiň uzak möhletleýin ösüşiniň berk binýadyny döredýär.
Daşary ýurt tejribeleri ulag-logistika we halkara söwda gatnaşyklarynda hem möhüm ýol görkeziji bolup hyzmat edýär. Köp ýurtlaryň geografik mümkinçiliklerini netijeli ulanmak boýunça tejribesi Türkmenistanda hem üstünlikli peýdalanylýar. Ulag geçelgeleriniň ösdürilmegi, halkara hyzmatdaşlygyň giňeldilmegi we logistika hyzmatlarynyň kämilleşdirilmegi milli ykdysadyýetiň dünýä ykdysady ulgamyna has işjeň goşulmagyna şert döredýär.
Türkmenistanyň ykdysady ösüşinde daşary ýurt tejribeleri diňe bir göçürip almak hökmünde däl, eýsem milli aýratynlyklara laýyklykda paýhasly uýgunlaşdyrmak hökmünde ulanylýar. Bu çemeleşme hormatly Arkadagymyzyň we Arkadagly Gahryman Serdarymyzyň öňe sürýän döwlet ösüş strategiýasynyň möhüm bölegi bolup, ýurduň ykdysadyýetini durnukly, innowasion we geljege gönükdirilen ugurda ösdürmäge hyzmat edýär. Hut şu paýhasly syýasat Türkmenistanyň dünýä ykdysady giňişliginde öz ornuny has-da berkidýän ygtybarly ösüş ýoluny üpjün edýär.
Atajan ROZYÝEW,
Türkmenistanyň Döwlet energetika
institutynyň mugallymy.
Teswirler