Garaşsyz Türkmenistanda ýaş nesliň döredijilik kuwwatyny açmak, olaryň ykdysady taýdan işjeňligini ýokarlandyrmak we jemgyýetiň ösüşine gatnaşygyny giňeltmek döwlet syýasatynyň ileri tutulýan ugurlarynyň biridir. Arkadagly Gahryman Serdarymyzyň ýaşlara gönükdirilen maksatnamalary ýaş telekeçiligiň kemala gelmegi üçin ygtybarly binýat bolup hyzmat edýär. Häzirki döwürde ýaş telekeçiligi diňe bir täze iş orunlaryny döretmegiň çeşmesi hökmünde däl, eýsem milli ykdysadyýetiň diwersifikasiýasy, innowasiýalaryň ornaşdyrylmagy we jemgyýetçilik durnuklylygynyň üpjün edilmegi üçin möhüm güýç hökmünde çykyş edýär.
Ýaş telekeçiligiň ösüşi ilkinji nobatda döwlet tarapyndan döredilýän amatly hukuk we ykdysady şertler bilen berk baglanyşyklydyr. Türkmenistanda telekeçilik başlangyçlaryny goramak, hususy eýeçiligiň hukuk taýdan kepillendirilmegi, ýeňillikli salgyt syýasaty we döwlet goldaw mehanizmleri ýaşlaryň öz işini başlamagyna giň mümkinçilikler döredýär. Bu ýagdaý ýaşlaryň diňe bir zähmet bazarynda iş gözleýji däl-de, eýsem iş dörediji hökmünde çykyş etmegine ýol açýar. Şeýle çemeleşme ykdysady ösüşiň täze çeşmelerini döredip, jemgyýetde işjeňligi artdyrýar.
Soňky ýyllarda ýaş telekeçileriň işjeňligi hyzmatlar ulgamynda, söwda, oba hojalygy önümleriniň gaýtadan işlenilmeginde, gurluşyk hyzmatlarynda hem-de sanly tehnologiýalar bilen baglanyşykly ugurlarda has aýdyň görünýär. Bu ugurlar ýaşlaryň bilim derejesine, häzirki zaman tehnologiýalaryna bolan höwesine we çalt uýgunlaşmak ukybyna laýyk gelýär. Hususan-da, sanly ykdysadyýetiň ösdürilmegi ýaş telekeçiler üçin täze mümkinçilikleri döredýär, sebäbi olar maglumat tehnologiýalaryny işine çalt ornaşdyrmaga we täze iş modellerini synap görmäge has taýýardyr.
Türkmenistanda ýaş telekeçiligiň ösüşinde bilim ulgamynyň hem aýratyn orny bardyr. Orta we ýokary okuw mekdeplerinde ykdysady bilimleriň, telekeçilik düşünjeleriniň we amaly başarnyklaryň berilmegi ýaşlaryň bazar gatnaşyklaryna düşünjesini giňeldýär. Bilim bilen telekeçiligiň sazlaşykly baglanyşygy ýaşlaryň diňe teoriýa bilen çäklenmän, öz ideýalaryny hakyky ykdysady taslamalara öwürmegine mümkinçilik berýär. Bu ýagdaý ýaş telekeçiligiň durnukly we uzak möhletli bolmagynyň möhüm şertidir.
Ýaş telekeçileriň jemgyýetçilik durmuşyndaky orny hem barha ýokarlanýar. Olar diňe bir ykdysady peýda gazanmak bilen çäklenmän, sosial jogapkärçilikli taslamalara hem gatnaşýarlar. Haýyr-sahawat çärelerine, ýerli jemgyýetleriň ösüşine, daşky gurşawy goramak bilen baglanyşykly başlangyçlara gatnaşýan ýaş telekeçiler jemgyýetde täze pikirleniş medeniýetini kemala getirýärler. Bu ýagdaý telekeçiligiň diňe girdeji çeşmesi däl, eýsem jemgyýetiň abadançylygyna hyzmat edýän güýçdigini görkezýär.
Döwlet tarapyndan ýaş telekeçileriň goldanylmagy olaryň halkara tejribesini öwrenmegine we daşary ýurt hyzmatdaşlary bilen gatnaşyklary giňeltmegine hem mümkinçilik berýär. Sergilere, forumlara we ykdysady hyzmatdaşlyk çärelerine gatnaşýan ýaş telekeçiler dünýä bazarlarynyň talaplaryna has gowy düşünýärler, bu bolsa olaryň önümleriniň we hyzmatlarynyň bäsdeşlige ukyplylygyny ýokarlandyrýar. Şeýlelikde, ýaş telekeçiligi milli ykdysadyýetiň halkara giňişligine integrasiýasynyň möhüm bölegine öwrülýär.
Türkmenistanda ýaş telekeçiligiň ösüşi döwrebap döwlet syýasatynyň, jemgyýetçilik ynamynyň we ýaşlaryň döredijilik kuwwatynyň sazlaşykly birleşmeginiň aýdyň netijesidir. Hormatly Arkadagymyzyň binýadyny goýan ösüş ýoluny Arkadagly Gahryman Serdarymyzyň täze mazmun bilen baýlaşdyrmagy ýaşlara diňe bir mümkinçilik däl, eýsem uly ynam hem berýär. Bu ynam bolsa ýaş telekeçileriň milli ykdysadyýetiň ösüşine mynasyp goşant goşmagyna itergi bolýar. Ýaş telekeçiligiň häzirki ösüşi Türkmenistanyň geljeginiň berk binýadynyň hut şu gün döredilýändigini görkezýär, sebäbi ykdysady taýdan işjeň, döredijilikli we jogapkär nesil döwletimiziň uzak möhletli ösüşiniň esasy daýanjy bolup durýar.
Gunça NURYÝEWA,
Türkmenistanyň Döwlet energetika
institutynyň mugallymy.
Teswirler