03.11.2024ý güni Türkmenbaşy şäherinde 10-njy orta mekdebiň ýapyk sport meýdançasynda Magtymguly Pyragynyň doglan gününiň 300-ýyllygyna bagyşlanyp, “Sagdyn nesil – sagdyn jemgyýet” atly kiçi futbol bäsleşigi geçirildi.
Bu bäsleşik Türkmenistanyň Magtymguly adyndaky Ýaşlar guramasynyň Balkan welaýatynyň Türkmenbaşy şäher geňeşiniň, Türkmenbaşy şäher Bedenterbiýe we sport bölüminiň, Balkan welaýatynyň Türkmenbaşy şäher bilim bölüminiň, Dana bilim merkeziniň Türkmenbaşy şahamçasynyň we Türkmenistanyň Mekdep sport federasiýasy jemgyýetçilik birleşiginiň bilelikde guramaklarynda gurnaldy. Bu sport çäresine Türkmenbaşy şäheriniň orta mekdepleriniň 9-njy we 10-njy synp okuwçylary gatnaşdylar.
Bäsleşigiň maksady sagdyn durmuş ýörelgesini wagyz etmek, ýaşlary bedenterbiýe we sport bilen meşgullanmaga höweslendirmek, şeýle-de türkmen edebiýatynyň beýik şahyry Magtymguly Pyragynyň mirasyny nesillerde giňden ornaşdyrmakdan ybaratdyr. Sport çäresi ýaşlaryň arasynda sagdyn durmuş ýörelgesiniň, sportuň ähmiýetiniň artdyrylmagyny gazanmak maksady bilen “Pähim-paýhas ummany Magtymguly Pyragy” ýyly mynasybetli geçirildi.
Bäsleşikde baýrakly orunlara mynasyp bolan toparlar we oýunçylara ýadygärlik sowgatlary we diplomlar gowşuryldy. Çäre, ýaşlaryň sport bilen meşgullanyp, sagdyn jemgyýetiň kemala gelmegine goşant goşmagyna gönükdirilendir. Şeýle-de, bäsleşik, ýaşlaryň özara dost-doganlyk gatnaşyklaryny ösdürmek bilen, ýakymly täsir galdyrdy.
Teswirler