Sport — ruhubelentlige badalga, sport — bagta ýaran bolmagyň salgysy. Sporta ömrüni baglan ynsanlaryň maksatlary asylly, arzuwlary wysally bolýar. Hut şonuň üçinem biziň ýurdumyzda sportuň we bedenterbiýäniň ösdürilmegine aýratyn ähmiýet berilýär. Gahryman Arkadagymyzyň başyny başlan sport taglymaty Arkadagly Serdarymyz tarapyndan mynasyp dowam etdirilýär. Şonuň netijesinde türkmen sporty belent badalgaly ösüşlere ýaran bolýar.
Sport bagtyň, bagtyýarlygyň kepili we parahatçylygyň ilçisi saýylýar. Arkadagly Serdarymyzyň sporty döwlet syýasatynyň ileri tutulýan ugruna öwürmegi, biziň buýsançly başymyzy göge ýetirýär.
Halkymyzyň saglygyny goramak, ýaş nesilleriň bagtyýar durmuşyny üpjün etmek babatda taýsyz tagallalary edýän hormatly Prezidentimiz köpçülikleýin bedenterbiýäni, olimpiýa hereketini, ýokary netijeli sporty ösdürmegi hemişe üns merkezinde saklaýar. Şol tagallalaryň netijesinde ýurdumyzyň sebitlerinde dünýä ölçeglerine laýyk gelýän iri sport desgalary, stadionlar, sport mekdepleri, atçylyk sport toplumlary gurlup, ulanylmaga berildi. Sebitde deňi-taýy bolmadyk Olimpiýa şäherçesi, Golf sport toplumy bolsa ak mermerli paýtagtymyzyň binagärlik gözelliginiň aýrylmaz bölegine öwrüldi. Arkadagly Serdarymyzyň sporty ösdürmekdäki şeýle giň gerimli işleri berkarar Diýarymyzy halkara derejeli sport ýaryşlarynyň geçirilýän mekany hökmünde dünýä tanatdy.
Hormatly Prezidentimiziň taýsyz tagallalarynyň ýaş nesilleriň sporta bolan höwesini has-da artdyrýandygy bizi diýseň begendirýär. Sebäbi indi sportuň dürli görnüşlerine höwes bildirýän, sagdyn durmuş ýörelgesine berk eýerýän ýaşlaryň hatary görnetin artdy. Olaryň sportuň dürli ugurlary boýunça ukyp-başarnyklary aýdyň ýüze çykyp, uly tejribe toplaýarlar.
Ruhy we beden taýdan sagdyn nesilleriň kemala gelmegi üçin ähli şert-mümkinçilikleri döredýän Arkadagly Serdarymyzyň jany sag, ömri uzak bolup, berkarar Watanymyzyň gülläp ösmegi ugrunda alyp barýan beýik işleri hemişe rowaçlyga beslensin!
Ödegeldi NURYMOW,
Döwletmämmet Azady adyndaky
Türkmen milli dünýä dilleri institutynyň
Bedenterbiýe kafedrasynyň mugallymy.
Teswirler