Maldarçylyk, Türkmenistanda oba hojalyk pudagynyň esasy sütünleriniň biridir. Ýurdumyzyň giň çöl we öri meýdan ýerlerinde, mallaryň dürli görnüşlerini ösdürip ýetişdirmek üçin amatly şertler bardyry. Maldarçylykdan ýokary öndürijilik almak we önümleriň hilini ýokarlandyrmak üçin weterinariýanyň roly aýratyn ähmiýete eýedir. Mallaryň saglygyny goramak we keselleriň öňüni almak boýunça alnyp barylýan işler diňe bir maldarçylygyň ösmegine däl, eýsem, azyk howpsuzlygynyň üpjün edilmegine hem ýardam berýär.
Maldarçylykda weterinariýa hyzmatlary esasan haýwanlaryň keselleriniň öňüni almak we bejermek bilen baglanyşykly işleri öz içine alýar. Ýurdumyzda bu ugurda esasy üns berilýän ugurlar şulardyr:
- Maldarçylyk fermalarynda epidemiologiki gözegçilik güýçlendirilýär, mallaryň ýagdaýy yzygiderli barlagdan geçirilýär.
- Mallaryň ýokanç kesellerine garşy sanjymlar geçirmek arkaly olaryň saglygy kepillendirilýär.
- Mallaryň iýmitlenişine üns berlip, olaryň iýýän iýmitleriniň hilini we ekologiýa taýdan howpsuzlygyny üpjün etmek işleri amala aşyrylýar.
Ýurdumyzda bu ugurda peýdalanylýan weterinariýa hyzmatlary diňe bir mallaryň saglygyny goramak bilen çäklenmän, olaryň öndürijiligini ýokarlandyrmakda hem möhüm orun eýeleýär.
Döwlet Baştutanymyzyň ýolbaşçylygynda Türkmenistanda maldarçylyk pudagyny ösdürmek boýunça ýörite maksatnamalar durmuşa geçirilýär. Olaryň çäklerinde mallaryň saglygyny goramak üçin täze weterinariýa merkezleri açylýar, döwrebap enjamlar bilen üpjün edilen laboratoriýalar işlenip taýýarlanylýar. Maldarçylyk fermalarynda geçirilen sanitar çäreler mallaryň ýokanç kesellerden goragyny güýçlendirmegiň esasy şerti bolup durýar.
Häzirki wagtda, Türkmenistanda ösdürilip ýetişdirilýän mallaryň et we süýt öndürijilikleriniň ýokary derejesi, haýwanlaryň saglygyna berilýän ünsüň we weterinariýa hyzmatlarynyň hiliniň ýokarydygyny görkezýär.
Maldarçylyk pudagynda dünýä tejribesine esaslanýan weterinariýa usullarynyň Türkmenistanda ornaşdyrylmagy, pudagyň ösüşini üpjün edýär. Awtomatlaşdyrylan ulgamlar we häzirki zaman tehnologiýalary arkaly, mallaryň saglygyny anyklamak we keselleriň öňüni almak işleriniň tizligi we takyklygy ýokarlanýar. Meselem, täze weterinariýa barlaghanalarynda biometrik maglumatlaryň ulanylmagy, mallaryň saglyk ýagdaýyny kesgitlemekde öňdebaryjy tejribe bolup durýar.
Maldarçylykda weterinariýanyň özboluşly orny, mallaryň saglygyny üpjün etmek arkaly pudagyň durnukly ösüşine ýardam berýär. Türkmenistanda döwlet tarapyndan berilýän goldaw we halkara tejribe esasynda alnyp barylýan işler, maldarçylyk önümleriniň hilini ýokarlandyrmak bilen bir hatarda, ýurduň ykdysadyýetiniň ösüşine-de uly goşant goşýar.
Güneş Temriýewa
S.A.Nyýazow adyndaky Türkmen
oba hojalyk uniwersitetiniň talyby.
Teswirler