Ata Watanymyz, Garaşsyzlygynyň 33 ýyllyk baýramyny Berkarar döwletiň täze eýýamynyň Galkynyşy döwründe uly üstünlikler bilen garşylady. Geçen 33 ýylyň dowamynda ýurdumyzda birnäçe möhüm we taryhy işleriň badalga almagy bilen, Bitarap Türkmenistan ýokary ösüş depginlerine eýe bolup, raýatlarynyň abadan we bagtyýar durmuşda ýaşamagyny üpjün edýän döwletleriň hataryna goşuldy.
Ýurdumyzyň depginli ösüşinde kabul edilen milli we döwlet maksatnamalarynyň üstünlikli durmuşa geçirilmegi, halkymyzyň ýaşaýyş-durmuş derejesiniň ýokarlanmagy, Bitarap Türkmenistanyň halkara abraýynyň artmagy her bir raýatyň goşandynyň bardygyny görkezýär. Watanymyzyň ösüşine goşant goşan raýatlarymyza sylag-hormat goýulyp, ýurdumyzy ösdürmekde zähmet çekýänlere Hormatly Prezidentimiziň ýörite medallary we sylaglary gowşuryldy.
Şol sylaglaryň biri, “Ýigit” hojalyk jemgyýetiniň direktory Agamyrat Jumageldiýewiç Çaryýewe «Watana bolan söýgüsi üçin» medaly bilen dabaraly ýagdaýda gowşuryldy.
“Ýigit” hojalyk jemgyýeti ýurdumyzda iri pomidor öndürijileriniň biri bolup, kärhananyň ýyladyşhana toplumy Ahal welaýatynyň Kaka etrabynda ýerleşýär we 34 ga meýdany öz içine alýar. Bu ýerde 600-den gowrak işçi zähmet çekip, her gün ýokary hünär derejesini görkezýärler. Kompaniýanyň daşary ýurt bazaryndaky önümleri Mahmal Agroproduct brendi bilen bellidir.
“Ýigit” hojalyk jemgyýeti diňe bir içerki bazarda üstünlik gazanmak bilen çäklenmän, daşary ýurt bazarlarynda hem tanalýan brendleriň biridir. Kärhananyň önümleri häzirki wagtda Ýewropa ýurtlaryna, Orta Aziýa bazarlaryna eksport edilip, Mahmal Agroproduct brendiniň ýokary hilli önümleri bilen halkara müşderileriniň ynamyny gazanýar.
Allamyrat Gapurow,
Türkmenistanyň Magtymguly
adyndaky Ýaşlar guramasynyň
işjeň agzasy.
Teswirler