Türkmen halkynyň şöhratly taryhyny ylmy esasda öwrenenimizde milli medeniýete, baý edebi mirasa aýdyň göz ýetirýäris. Munuň özi ene dilimizde döredilen eserleriň, ajaýyp goşgularyň gymmatly mirasdygyny aýdyň beýan edýär. Türkmeniň akyldar şahyry Magtymguly Pyragynyň edebi mirasyny öwrenmekde we dünýä ýaýmakda alnyp barylýan işler hormatly Prezidentimiziň taýsyz tagallasy bilen uly rowaçlyklara eýe bolýar.
Häzirki wagtda akyldar şahyryň goşgulary diňe bir biziň ýurdumyzda däl, eýsem, dünýä okyjylarynda hem gyzyklanma döredýär. Şahyryň ajaýyp şygyrlary dünýäniň ençeme dillerine terjime edilip, giň okyjylar köpçüligine ýetirildi. Akyldar şahyryň goşgulary ähli adamzadyň köňlüne nur çaýýar, ýagşylygy, ynsanperwerligi wagyz edýär. Beýik söz ussady Magtymgulynyň şygyrlarynda mertlik, watançylyk, arassa ahlaklylyk, tebigata söýgi, rehimdarlyk, ula-kiçä hormat goýmak, hoşniýetlilik, ynsanperwerlik ýaly pikirler öňe sürülýär. Akyldar Magtymguly Pyragynyň umumadamzat bähbitli çuňňur parasata ýugrulan ajaýyp goşgulary biziň her birimiz üçin ruhy hazynadyr.
Garaşsyzlyk ýyllarynda Magtymguly Pyragynyň edebi mirasy töwerekleýin öwrenilip başlandy. «Magtymguly döwürdeşlerini, halky adalatly jemgyýetiň, bagtly ýaşaýşyň gözbaşynyň nämedigine göz ýetirmäge, bolup geçýän zatlaryň düýp mazmunyna düşünmäge çagyrýardy. Öz iliniň asuda, parahat durmuşda ýaşamagyny, ylymly-bilimli bolmagyny, medeniýetiniň beýgelmegini arzuwlan beýik şahyr halkyna pähim-parasatdan we şirin duýgulardan pürepür bolan ajaýyp şygyrlar hazynasyny miras galdyrdy» diýip, Gahryman Arkadagymyz belleýär.
Berkarar döwletiň täze eýýamynyň Galkynyşy döwründe şahyryň doglan gününiň 2024-nji ýylda belleniljek dabaraly toýuna uly ähmiýet berilýär.
Umuman, Magtymguly Pyragynyň goşgularynyň hersi giden bir dünýä, ondaky çuňňur many-mazmuny, ruhy öwüşgini söz bilen beýan edäýmek aňsat däl. Şu sebäpden, akyldar atamyzyň ruhy mirasyny näçe taryp etsek-de bärden gaýdýar. Onuň her bir sözi dürüň şuglaly dänesidir.
Humaý ALLABERDIÝEWA,
Döwletmämmet Azady adyndaky
Türkmen milli dünýä dilleri
institutynyň talyby.
Teswirler