Türkmenistanly mekdep okuwçysy Emir Han Ahmedow halkara derejesinde geçirilen “Komodo” halkara matematika festiwalynda iň ýokary baýragy eýe boldy.
Daşoguz şäheriniň daşary ýurt dillerini öwrenmek boýunça 1-nji ýöriteleşdirilen orta mekdebiniň 4-nji synp okuwçysy Emir Han Ahmedow matematika dersi boýunça “Komodo” onlaýn olimpiadasyna gatnaşyp, “Salamander” kategoriýasy (10 ýaşa çenli) boýunça altyn medala eýe boldy. Munuň bilen çäklenmän altyn medal alanlaryň arasynda-da tapawutlanyp absolýut ýeňijisi bolmagy başardy. Emir Han olimpiadanyň matematika boýunça çylşyrymly meseleleridir mysallarynyň dürli görnüşlerini üstünlikli çözüp, ýokary netijäni gazanmagy başardy.
Mekdep okuwçylarynyň arasynda geçirilýän “Komodo” halkara matematika festiwaly Indoneziýanyň “Eduversal” bilim guramasy tarapyndan gurnalýar. Bäsleşik onlaýn görnüşinde ýokary derejede, webkameralaryň gözegçiliginde geçirilýär. Öňki ýyllarda geçirilen I-EMC’2020 we I-EMC’2021 olimpiadalary şu ýyl “Komodo” matematika festiwaly ady bilen geçirildi. Bu matematika bäsleşigi 4 ýaş kategoriýasynda geçirildi: “Salamander” – 10 ýaşa çenli, “Hameleon” – 12 ýaşa çenli, “Iguana” – 15 ýaşa çenli we “Dragon” – 18 ýaşa çenli. Bu ýylky olimpiada 65 döwletden 2 müňden gowrak mekdep okuwçysy gatnaşdy.
Emir Han Ahmedowa bu bäsleşikde üstünlikli çykyş etmegi üçin ýardam beren onuň synp mugallymy Oguljemal Nurberdiýewa hem “Komodo” olimpiadasynyň guramaçylary tarapyndan minnetdarlyk haty bilen sylaglandy.
Şöhrat Ataýew,
Türkmenistanyň Daşary işler ministrliginiň
Halkara gatnaşyklary institutynyň 1-nji ýyl talyby
Teswirler