Şu gün Kataryň paýtagty Doha şäherindäki «Al-Bida» stadionynda 2022-nji ýyldaky «FIFA» dünýä çempionatyna badalga berildi. Katar bu dünýä çempionatyna 12 ýyldan bäri taýýarlyk görýär.
Dünýä çempionatynyň açylyş dabarasyna FIFA-nyň Prezidenti Gianni Infantino – bilen birlikde, Iker Casillas, Roberto Carlos we Cafu, Youri Djorkaeff, David Trezeguet we Marcel Desailly – ýaly öňki meşhur futbolçylar hem gatnaşdylar.
Katar geçirilýän dünýä çempionaty üçin 300 milliard dollar sarp edip, ähli mümkinçilikleri döretdi. Hat-da şäherlerde we meýdançalarda äpet mawy ekranlar gurlup, futbol janköýerleriniň göni ýaýlymda futbola tomaşa etmegi üçin şertler döredildi.
AÇYLYŞ DABARASYNDA SAHNADA ÝYLDYZLAR ÇYKYŞ ETDI
2022-nji ýyldaky «FIFA» dünýä çempionatynyň açylyş dabarasy – Kataryň paýtagty Doha şäherindäki 60 müň adamlyk «Al-Bida» stadionynda geçirilip, dabarada dünýä belli ýyldyzlar çykyş etdi. Sahnada: BTS-niň esasy aýdymçysy Jungkook, Black Eyed Peas, J Balvin, Nora Fatehi we Patrick Nnaemeka Okorie ýaly meşhurlar çykyş etdiler.
ÝEŇIJÄ 42 MILLION DOLLAR, IKINJI ÝERE 30 MILLION DOLLAR BAÝRAK BERLER
Oýunlar 5 dürli şäherde we 8 dürli stadionda oýnalar. Dünýä çempionatyna gatnaşjak 32 topar jemi 64 oýun oýnar. «FIFA» dünýä çempionatynda ýeňiji bolan milli ýygyndy topara 42 million dollar, finalda ýeňlip, ikinji ýer alan topara 30 million dollar, üçünji orny eýelän topara 27 million dollar, dördünji orna bolsa 25 million dollar pul baýragy berler.
DÜNÝÄ ÇEMPIONATY KATAR BILEN EKWADORYŇ ARASYNDAKY AÇYLYŞ OÝNY BILEN BAŞLANDY
2022-nji ýyldaky «FIFA» dünýä çempionaty «Katar – Ekwador» oýny bilen başlady. Oýun başlamazdan öň stadiona dünýä çempionatynyň resmileri tarapyndan ýeňiji boljak topara beriljek «Dünýä Kubogy» getirildi. Ýöne gynansak-da, oýunda Ekwador – Katary 2:0 hasabynda ýeňdi.
DÜNÝÄ KUBOGYNYŇ IŇ GYMMAT OÝUNÇYLARY:
1) Mbappe: 150 million ýewro;
2) Winicius Jr: 120 million ýewro;
3) Fil Foden: 120 million ýewro;
4) Jamal Musiala: 100 million ýewro;
5) Pedri: 100 million ýewro;
6) Jude Bellingham: 100 million ýewro;
7) Federiko Walwerde: 100 million ýewro;
8) Garri Keýn: 90 million ýewro;
9) Bukayo Saka: 90 million ýewro;
10) Gavi: 90 million ýewro.
Atajan EÝÝUPOW.
Teswirler