Häzirki wagtda Türkmenistan ýurdumyz dünýä döwletleri bilen parahatsöýüjilik we özarabähbitlilik gatnaşyklaryny has-da ösdürýär. Bu ugurda, hususan-da ýangyç-energetika, ulag-kommunikasiýa we söwda-ykdysady ugurlarda ýurdumyzyň esasy hyzmatdaşlarynyň biri hem Hytaý Halk Respublikasydyr. Türkmenistan HHR bilen özara gatnaşyklaryny ikitaraplaýyn we köptaraplaýyn esasda işjeň alyp barýar.
2023-nji ýylyň 19-njy maýynda hormatly Prezidentimiz Serdar Berdimuhamedow HHR-iň Sian şäherinde geçirilen “Merkezi Aziýa – Hytaý” birinji sammitine gatnaşdy. Sammit esasan Türkmenistanyň Hytaý Halk Respublikasy, Täjigistan Respublikasy, Gazagystan Respublikasy, Gyrgyzystan Respublikasy we Özbegistan Respublikasy bilen gatnaşyklaryny ösdürmekde möhüm ädim boldy. Hormatly Prezidentimiz sammitde çykyş edip, özara gatnaşyklary ösdürmek boýunça birnäçe teklipleri öňe sürdi. Sözüniň soňunda hormatly Prezidentimiz Merkezi Aziýa we Hytaýyň ýaşlarynyň Forumyny Türkmenistanyň Mary şäherinde geçirmegi teklip etdi.
Häzirki döwürde Türkmenistan döwletimiz HHR bilen ykdysadyýet, ylym-bilim, saglyk we medeniýet ulgamlarynda işjeň gatnaşyk alyp barýar. 2009-njy ýylda açylan Türkmeistan-Hytaý gaz geçirijisiniň üsti bilen köp mukdarda türkmen tebigy gazy Hytaý welaýatlaryna eksport edilýär. Şeýle-de iki döwletiň arasynda söwda-ykdysady ugurda alnyp barylýan hyzmatdaşlyk hem giň gerime eýe boldy.
Ogulmaral ÝALKAPBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň talyby.
Teswirler